Viño e queixo, unha maridaxe que leva o nome de Galicia por todo o mundo

Son dous dos produtos galegos que máis triunfan nos concursos internacionais


O viño e o queixo poden facer unha boa maridaxe e os franceses sábeno ben. Son dous dos produtos que fixeron máis famoso ao noso país veciño, se falamos de gastronomía. Pero o certo é que, se observamos os resultados das últimas competicións internacionais, tamén vemos que cada vez son máis as elaboracións galegas que destacan nestas dúas áreas. Non hai ningún concurso de viños no que non aparezan Rías Baixas, Ribeiro ou Ribeira Sacra entre os primeiros clasificados. E só hai que ver a lista dos últimos premios mundiais do queixo -os de 2019 porque os do 2020 tiveron que ser suspendidos debido ao coronavirus- para darse conta de que Galicia tamén ten moito que dicir na elaboración de produtos lácteos de calidade. Viños e queixos son os encargados de levar o nome da comunidade polo mundo enteiro e asocialo á calidade. Nos últimos anos, convertéronse na nosa gastronomía máis internacional, no noso mellor embaixador.

Entre os cen mellores viños

Hai pouco máis dun mes, The Wine Advocate, a revista que fixo famosa o gurú do viño Roberto Parker, publicou unha lista dos que consideraba os 100 mellores viños do mundo. E entre a ducia de elaboracións españolas que apareceron nesta lista de viños icónicos, había dous galegos: Eulogio Pomares e Fedellos do Couto. O primeiro, un adegueiro que elabora os seus viños en terras das Rías Baixas e, algúns deles, amparados por esta denominación de orixe. A segunda, unha pequena adega que traballa na zona da Ribeira Sacra e que elabora os seus viños coa uva bastarda, unha variedade moi minoritaria. Aínda que ambas mencións tiveron unha grande acollida, o certo é que non é a primeira vez que esta prestixiosa publicación pon a vista en Galicia. Ribeira Sacra ou a propia Rías Baixas protagonizaron algúns dos seus artigos nos últimos meses, recollendo grandes gabanzas para o traballo que están a facer as adegas. Porque dende este pequeno recuncho do mundo, hai moitas marcas que conseguiron facerse un oco nas guías máis prestixiosas do mundo e conquistar o xurado de certames con tanta sona coma o que se celebra en Burdeos ou os que teñen lugar na capital inglesa ou en Bruxelas.

O éxito das variedades galegas é tal que en moitas partes do mundo xa se está a plantar a uva albariña para tratar de emular os viños que se elaboran baixo a denominación de orixe Rías Baixas. Ademais, as súas elaboracións teñen moita demanda nos mercados internacionais e, actualmente, máis do 30% da colleita comercialízase fóra das nosas fronteiras. A campaña pasada vendéronse máis de oito millóns de litros en mercados exteriores, converténdose por primeira vez Europa no principal cliente desta denominación de orixe, por diante dos Estados Unidos. Tamén as outras catro denominacións de viño que existen en Galicia lanzáronse a conquistar os mercados exteriores. E incluso os viños con Indicación Xeográfica Protexida (IXP) atopan un gran recoñecemento e novos clientes no exterior.

Como ocorreu no seu día en Francia, o viño converteuse nun gran embaixador da gastronomía galega. Tanto é así, que Medio Rural está a traballar para reforzar a súa presenza nos mercados exteriores baixo o paraugas da marca Galicia Calidade. Un único selo que permitirá identificar e unir os esforzos de todas as denominacións de orixe galegas para seguir asentándose nos mercados internacionais e dando a coñecer a riqueza vitícola da nosa comunidade.

Unha potencia láctea

Pero se en Galicia sabemos de viño, moito máis sabemos de leite. Por algo somos unha das rexións lácteas máis importantes de Europa e, sen dúbida, a principal de toda España. Actualmente, na comunidade hai preto de 6.800 explotacións que se dedican á produción de leite. Preto de tres millóns de litros deste produto saíron destas granxas durante o ano que está a piques de rematar, o que supón o 40 % de todo o que se produce en España. E, aínda que moita desta leite sae da comunidade sen transformar, cada vez son máis as empresas que apostan por facer aquí produtos de calidade coma o queixo. Contamos con catro denominacións de orixe, pero tamén cunha gran cantidade de empresas que están apostando por elaboracións diferentes. Entre todas, están a conquistar os principais certames internacionais, como o World Cheese Awards, que na súa última edición deixou once galardóns na comunidade galega.

Arzúa-Ulloa, Tetilla, San Simón da Costa e O Cebreiro son as catro denominacións de orixe do queixo galegas nas que están inscritas un total de 3.429 gandeiros e 67 queixerías, segundo os datos que manexa a Consellería do Medio Rural. Durante o ano 2019 produciron máis de cinco millóns de queixos e xeraron un volume de negocio superior aos 36 millóns de euros. E todas son coñecidas pola calidade dos seus produtos, como o demostran os premios acadados en diversos concursos internacionais. Así, no último World Cheese Awards foi un queixo amparado pola denominación de orixe Tetilla o que acadou unha Gran Medalla de ouro. A elaboración era obra de Queserías Sarrianas. Non foi o único tetilla que triunfou neste certame. Houbo tamén unha medalla de ouro para Queserías del Eume, que a maiores recibiu galardóns por outras das súas elaboracións, coma un afumado.

Nos mercados exteriores non só están despuntando queixos amparados polas denominacións. Hai outras elaboracións que tamén conseguiron conquistar ao xurado do certame. Foi o caso de Bisqato, un queixo de cortiza lavada, ou de Galmesano, unha elaboración de pasta cocida e larga maduración que logrou unha medalla de prata e dous de bronce. Se alguén lle pregunta a todos os produtores o segredo do seu éxito a resposta e unánime: está calidade do leite que se produce en Galicia. Unha materia prima excelente que permite que estas elaboracións compitan sen ruborizarse coas que fixeron famosas ao país veciño. De queixos e viños podemos presumir. E moito.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Viño e queixo, unha maridaxe que leva o nome de Galicia por todo o mundo