Ana Vila, poetisa: «As aldeas subsisten grazas ao traballo das mulleres»

A escritora e labrega presenta este venres en Taboada o seu cuarto poemario, «Sentidos nunha aldea», en homenaxe ás aldeas e á escritura a man


Ana Vila Portomeñe (Taboada, 1969), a «poeta labrega», presenta este venres, día 8, en Taboada (antigo salón de actos, 17.30 horas) o seu cuarto poemario, autoeditado, Sentidos nunha aldea. O libro, impreso en La Voz de la Verdad, foi encadernado por Inés de Castro. A data elixida para a presentación non é casual. Ademais de ser o Día da Muller, polo que o acto ten unha parte reivindicativa, para Ana Vila tamén é un día especial, pois cumpre 50 anos.

-Cuarto libro xa... ¿como consegue levar ese ritmo entre o traballo, a familia, a escritura...?

-As poesías sáenme con facilidade, nos momentos de relax, cando estou coas vacas e no medio da natureza, esa contorna axuda moito. Poñer despois en marcha o proceso de escribir un libro xa é máis complicado.

-¿Que encontrarán os lectores neste libro?

-É un poemario, ilustrado con fotografías e debuxos. Foi escrito a man, e logo escaneado, polo que non hai ningunha folla igual a outra. Trátase de poemas sinxelos que pretenden ser unha homenaxe ás aldeas e á escritura a man, lembrando que antigamente moita xente de aldea non sabía ler nin escribir.

-¿A quen vai dirixido?

-É para todos os públicos, mesmo para os nenos. Por exemplo, hai un poema sobre a natureza ilustrado cunha foto dunha árbore cuns paxariños, e iso tamén é unha mostra do que hai na aldea, de que tamén se pode un parar e mirar arredor, ou facer xogos divertidos, por exemplo, contando cantos paxariños se ven.

-¿De onde lle ven a inspiración?

-Da natureza sempre, do entorno, da Galicia en si mesma, labrega e mariñeira. Nos poemas falo de ánimo, de recordos, de amor...

-Novamente, a presentación do libro é nunha data especial, o Día da Muller.

-É unha homenaxe ás aldeas e, sobre todo, ás mulleres. Porque as aldeas subsisten, na súa maioría, grazas ás mulleres, que se encargan das explotacións e dos coidados de nenos e maiores.

-¿Cando estará á venda?

-Ponse á venda o venres en Lugo, nas librarías Balmes e La Voz de la Verdad, e nas librarías de Taboada, Chantada, Monterroso e Antas de Ulla.

-¿Como foi a acollida dos anteriores libros?

-Pintasías e Algo de mí con mucho de ti están esgotados, mentres que Latexos dunha labrega aínda está á venda. A acollida de todos eles foi moi boa, a pesar de que polo meu traballo non podo ir a moitas presentacións nin dedicar moitos esforzos á venda. De todas formas, non pretendo que o meu libro sexa o máis vendido, gustaríame que fose lido e que, polo menos, quedase un alento.

-¿Para cando o quinto libro?

-Aínda é pronto, pero supoño que farei un libro un pouco máis íntimo e persoal proximamente.

-Trala presentación de Taboada, ¿ten máis actos previstos?

-O día 13 estarei en Chantada nunha lectura de poemas con motivo do Día da Muller; o día 16, na Feira do Disco e Libro Galego en Monterroso; e o 23 de abril, na Feira do Libro en Lugo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Ana Vila, poetisa: «As aldeas subsisten grazas ao traballo das mulleres»