As precursoras da loita da muller

FUGAS

A poeta Luz Pozo asina o primeiro libro da colección, «Follas novas», de Rosalía de Castro
A poeta Luz Pozo asina o primeiro libro da colección, «Follas novas», de Rosalía de Castro FUGAS

Luz Pozo, Inma López Silva e María Canosa, autoras dos prólogos da colección de La Voz que comeza o 8M, celebran o vigor das pioneiras galegas na defensa da igualdade. A nosa liberdade comeza nas súas letras

07 mar 2020 . Actualizado a las 09:51 h.

Son as precursoras, nais intelectuais e afanosas do 8M, pioneiras dunha loita con moitos elos e nomes que comezan a asomar tras anos de escuridade e desleixo na proxección social da muller. A colección As Precursoras, que La Voz de Galicia comeza a entregar este domingo, 8 de marzo, ofrece aos lectores tres obras cumio na defensa da igualdade e a liberdade das mulleres, tres xoias máis para pensar que para limitarse a lucir.

A mobilización tomou as letras antes que as rúas en Galicia, á vez que Pankhurst lideraba o movemento feminista en Gran Bretaña. Rosalía de Castro (Santiago, 1837-Padrón, 1885), Emilia Pardo Bazán (A Coruña, 1851-Madrid, 1921) e Concepción Arenal (Ferrol, 1820-Vigo, 1893) foron as primeiras en sinalarlle á muller a porta da casa (para saír), con textos que estremecen pola vixencia e o vigor da ollada. A loita feminista fixo músculo, de forma máis manifesta ou discreta, no XIX. É un pulso que aínda se sente vivo nas Follas novas desde as que Rosalía nos fala dende 1880, cunha intención moi clara xa no primeiro poema da obra: «Daquelas que cantan as pombas i as frores /todos din que teñen alma de muller./ Pois eu que n'as canto, Virxe da Paloma, ai! de que a terei?». Un dos primeiros golpes feministas que houbo en verso é este poema das Follas novas que namoraron á escritora Luz Pozo Garza (Ribadeo, 1922), autora do diálogo poético que abre a edición do libro da colección As Precursoras, de La Voz.

«Miña nai e meu pai facían regueifas cos versos de Rosalía», recorda Luz, que mantivo dende nena no seu Ribadeo natal unha relación de complicidade coa autora dos Cantares. «Miña nai sabía máis!», ri nunha homenaxe exprés á figura materna. «Liamos a Rosalía despois de cear, mamá sabía de memoria as palabras da Sombra», recorda.