Teatro, arte, cinema, libros e moito máis para este sábado na Costa da Morte
CARBALLO
¿Sen plan este 17 de xaneiro? Nesta axenda tes as principais citas da xornada, de Cerceda a Fisterra
17 ene 2026 . Actualizado a las 05:00 h.Hoxe • Sábado 17 de xaneiro e ademais de todos os bailes para maiores que pode consultar nesta información, estas outras propostas hoxe na Costa da Morte:
Carballo • Conmemorando o Día Internacional polo Decrecemento, o Casino acolle unha ampla xornada: feira artesanal (11.00); palestra Soberanía alimentaria, produción labrega (11.30); vermú con Afroliada (13.00); xantar e palestra Sementamos soberanía, colleitamos comunidade (16.00). Será, doutro lado, día de San Antón Abade en Noicela, con misa e bendición de mascotas ás 12.30 horas. No estudo Garabato, ás 21.00, inaugurarase a exposición Linias e Liñas, da carballesa Milagros Cotelo: apertura ás 21.00 horas (máis información, aquí).
Zas • Acollen as Torres do Allo, ás 12.00 horas, a presentación da nova web do Concello, acto do que tomarán parte Manuel Muíño, alcalde; Gema Lema, responsable de Medialeva, e Diego Alonso, de WP Nordés. O acto incluirá ademais a conferencia A intelixencia artificial na vida das persoas, a cargo dos docentes Óscar Manuel Rey e Fina Paulos.
Malpica • A asociación Malpica Felina, co apoio do Concello, promove no mercado un mercadillo solidario: de 09.00 a 13.30. Roupa de segunda man, complementos, xoguetes ou bixutería a prezos «incribles» e por boa causa. Tamén en Malpica, na Casa do Pescador, inaugurarase ás 19.00 horas a exposición Peridotita, de Manuel Regueiro. Intervirán o alcalde, o presidente da confraría, o secretario do Fogar dos Pensionistas, Julia Ures e Vidal Romaní.
Fisterra • Cita para a primeira infancia na fin do mundo, onde o mercado cultural dará cabida ás 12.00 horas a un espectáculo de danza para pequenos de oito meses a catro anos. Trátase de Catro, de Caramuxo. Acceso libre.
Cerceda • Bota a andar a programación cultural de xaneiro no auditorio municipal. Está prevista unha sesión de cine para as 20.00 horas: +Cuñados. Con acceso de balde.
Muxía • Tarde de teatro na vila da Barca, cun xaneiro vivo que esta tarde pasará polo teatro. O Salón do Voluntario acollerá ás 20.00 horas a obra O soño dunha noite de San Xoán, do Grupo Municipal de Teatro de Ames. É unha das obras máis coñecidas de Shakespeare. O custe da entrada é de só 1 euro.
Laxe • Na libraría Risón, ás 19.00 horas, presentación da novela Illa de sangue, de Carmen V. Valiña, Premio de Narrativa Breve Repsol 2025.
Corcubión • O ciclo da Deputación Escora Danza volverá a Corcubión este ano, e para escoller a programación haberá hoxe un encontro: ás 11.30, na Capela do Pilar.
Barizo (Malpica) • Arrancan as citas do 2026 no restaurante La Ratona do porto de Barizo. Hoxe toca concerto, con Sylvie Lewis, artista británica que mestura o folk, o country, o swing, o jazz... Será ás 20.30, con acceso libre e gratuíto, e taquilla inversa (un pode deixar a cantidade que considere oportuna).
Vimianzo • Tormenta de ideas para a vindeira edición do Asalto ao Castelo: 12.00 horas, na Casa da Cultura.