Roberto Pascual, director da MIT de Ribadavia: «O obxectivo é a internacionalización, pero con calidade, non en número»

xosé manoel rodríguez OURENSE / LA VOZ

OURENSE

Roberto Pascual é o director da MIT de Ribadavia.
Roberto Pascual é o director da MIT de Ribadavia. MIGUEL VILLAR

A MIT 2021 dá un protagonismo especial ás miradas sobre Shakespeare

04 jul 2021 . Actualizado a las 05:00 h.

Volve a MIT de Ribadavia e faino con máis forza que nunca. Coa internacionalización como bandeira e cunha edición moi reivindicativa: dende o lema que define á Mostra 2021 -A arte marca a diferenza- á temática de moitas das montaxes, pasando por unha aposta decidida pola danza. Roberto Pascual, director da Mostra Internacional de Teatro de Ribadavia (MIT), mantén a liña de traballo a prol das coproducións como unha canle para darlle maior visibilidade á Mostra e segue dando protagonismo ás novas xeracións emerxentes.

—Pasamos da celebración dos 35 anos, no 2019, ao escenario ameazador do coronavirus. Como se viviu a arriscada aposta de celebrar a MIT 2020? Sentiuse a presión nesta decisión pioneira?

—Falamos moito antes de decidir manter a Mostra e había medo por como se estaban a desenvolver as cousas, con moitas convocatorias suspendidas. Tamén pola presión ou ataques que sufriron outros compañeiros, como o director de Almagro. Houbo risco, tamén presión, pero foi unha experiencia que nunca esquecerei, pola implicación de todo o mundo e o apoio dos veciños e os grupos. Houbo unha empatía marabillosa e iso foi o mellor; e o sentimento de comunidade.