Abraham Cupeiro: «Presentarei en setembro o segundo disco, en Bilbao»

O compositor e construtor de instrumentos musicais prepara xa o seu terceiro traballo, centrado na música barroca

Cupeiro, gravando «Pangea» nos estudos de Abbey Road, en Londres
Cupeiro, gravando «Pangea» nos estudos de Abbey Road, en Londres

Lugo / La Voz

O estado de alarma pola pandemia do covid-19 pillou ao músico sarrián Abraham Cupeiro co seu segundo traballo, Pangea -gravado a finais do 2019 nos famosos estudos londinienses de Abbey Road, coa prestixiosa Royal Philharmonic Orchestra-, a piques de saír ao mercado. O confinamento truncou esta posta en marcha e tamén a xira de presentación, aínda que este construtor de instrumentos e compositor, que recupera instrumentos musicais milenarios, non deixou de traballar nestes últimos meses. Coa fin do estado de alarma, Cupeiro retoma proxectos e emprende outros novos.

-Como se presenta este verán?

-Estou moi agradecido porque a xente seguiume chamando para facer concertos, pero anulei todo no verán para centrarme noutras cousas. Así, no mes de setembro, poderei coller isto con máis forza. Presentarei en setembro o segundo disco, en Bilbao, tocando coa Banda de Bilbao. Logo comezarei unha xira por Costa Rica, Canarias, Galicia... Preferín pospoñelo porque, do contrario, habería concertos anulados... sería como facelo a medias e tampouco ía descansar nin desconectar.

-Ten xa terceiro disco en mente?

-Si. O primeiro traballo foi Os sons esquecidos, co que recuperei instrumentos milenarios e músicas populares. Despois veu Pangea, que se centra nas músicas étnicas do mundo. E agora estou traballando no terceiro disco, que estará orientado a músicas barrocas, do século XVIII.

-Que outros proxectos ten en marcha?

-Seguirei cos proxectos didácticos, pero tamén estarei este verán coa presentación da película María Solinha, dirixida por Ignacio Vilar, para a que compuxen a banda sonora. Redondela e Cangas foron os lugares elixidos para as estreas.

«María Solinha» proxectarase o xoves en Sarria

Xoves 25 • 21.30 horas • Praza da Vila • Sarria • A película María Solinha, para a que Abraham Cupeiro compuxo a banda sonora, poderase ver en Sarria este xoves, dentro da programación das festas de San Xoán. O filme, dirixido por Ignacio Vilar e coproducido por Vía Láctea Filmes e Televisión de Galicia, conta coa música de Cupeiro, que empregou os sons dunha corna, unha caracola e un cárnix. Así se fía o discurso sonoro da película, unha revisión contemporánea da lenda de María Soliña, construída arredor da persecución da Inquisición ás mulleres. Está rodado integramente en galego.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Abraham Cupeiro: «Presentarei en setembro o segundo disco, en Bilbao»