Maribel fica para sempre en nós


Maribel Ruíz é, foi e será sempre unha persoa marabillosa e inesquecible, unha compañeira, amiga, camarada, sempre cunha palabra de alento para todas as persoas que estabamos ao seu arredor. Para o BNG da Estrada foi unha das persoas fundamentais nos últimos 30 anos. Mesmo antes de ser militante colaboraba sempre, tamén o seu compañeiro, Suso Muñoz Arroyo, finado hai dous anos, compartía militancia no BNG, ambos deron moitas mostras do seu compromiso, solidariedade e xenerosidade. Sempre discreta e sempre formando equipo, era un gusto traballar con ela, fixo tanto labores cotiás e sinxelas coma os repartos de propaganda eleitoral, ou os convites a tantos actos que temos organizado e compartido, coma labores de máis complexidade, coma as que desenvolveu na área de Facenda tanto na oposición coma na etapa de goberno. Disciplinada, seria, traballadora e rigorosa, Maribel foi sen dúbida a mellor concelleira de Facenda que tivo na súa historia o Concello da Estrada. Maribel é un exemplo de compromiso político, coa militancia activísima no BNG (sempre estaba), coas causas xustas, desde o seu compromiso sindical, a loita antiencoros, o peche do IBI, o seu apoio ao Pobo Saharauí (sempre lembraba a súa infancia no Sáhara), con Nunca Máis, con Queremos Galego, co feminismo (é socia fundadora do Colectivo feminista Deza Tabeirós), con todas as loitas veciñais e sociais, gozaba da lectura, a música clásica, os paseos na natureza, conversadora cultísima adoraba este país, a nosa cultura e aos seus, aos que acompañamos na dor da súa perda. Maribel, muller brava, fica para sempre en nós.

Xosefina Pereira Rivas, Raquel López Doce e Susana Camba Castro (exconcelleiras e concelleira do BNG).

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Maribel fica para sempre en nós