Con un programa de música rusa do século XX e ás ordes da batuta do seu director titular, Víctor Pablo, a Orquestra Sinfónica de Galicia volve ao Auditorio de Galicia para participar na temporada de abono. No concerto, que se celebra esta noite a partires das 21.00 horas e con entradas a 9 euros, a Sinfónica de Galicia contará coa participación de dous solistas e de dous coros diferentes, o da propia Orquestra Sinfónica, integrado por oitenta voces e dirixido por Joan Campany, e o Coro Easo, formación de voces masculinas que dirixe Rallo Sagarzuza. O pianista Alexander Toradze, considerado un virtuoso da tradición romántica, será solista no Concerto para piano e orquestra núm. 3 en Do maior de S. Prokokiev. O outro solista será o baixo Oleg Bryjak, que interpretará, con orquestra e coros, a obra de Shostakovich A execución de Stepan Razin , que será estrea en España.