Vicente Rodríguez Justo: «Competir contra a PlayStation é moi difícil, pero é posible»

O centro de lectura e préstamo verinés recibiu un premio do Ministerio de Cultura pola súa actividade


ourense / la voz

A biblioteca de Verín acumula ano tras ano premios e recoñecementos de todo tipo. Hai dez que comezou un proxecto, encabezado por Vicente Rodríguez Justo, oficial de bibliotecas e responsable da verinesa, que dá os seus froitos. Afirma que é grazas ao traballo de moita xente, como a súa compañeira Aurora Prieto e os voluntarios.

-Cantos premios levan?

-O último, que outorga o Ministerio de Cultura, é o mais importante a nivel nacional. Tamén temos a certificación da Unesco dende 2012 como biblioteca asociada, porque cumprimos os requisitos de fomento da lectura, integración social e valores culturais. É importante unha distinción do Parlamento Europeo, de alto patrocinio, que foi concedida polas actividades culturais que realizamos o Día as Letras Galegas. É incrible para unha biblioteca dunha vila do tamaño de Verín estar xunto as de cidades culturais importantes. Para nos é un espaldarazo.

-Isto faise con moito traballo.

-Non se fixo onte. Hai dez anos comezamos o camiño da dinamización cultural dentro da biblioteca. Queremos seguir medrando e atraendo novos lectores. É a única forma de competir é facéndoa atractiva. Sempre dicimos que competir coa PlayStation é difícil, pero é posible. Vemos que coas actividades de contacontos e manualidades crecemos ano a ano. E tamén pasa co préstamo de libros aos nenos. O público infantil aumenta e iso radica nas nosas actividades.

-Fálenos das súas propostas.

-Está claro que fai máis o que quere que o que pode. Fan falla recursos, pero facer unha actividade de contacontos con nenos non é caro, salvo que contrates a un profesional ou a unha compañía de actores ou actrices un día especial... Utilizamos material reciclable para as manualidades e buscamos actividades que non sexan custosas. Os contos preparámolos dos que temos aquí. Se o facemos nós, cos nosos voluntarios, e non traemos a ninguén, a fin de ano non supón gasto.

-Cantos socios ten na actualidade a biblioteca?

-Estamos sobre os 3.800. Nese número están incluídos adultos e infantís. Todos os anos temos a obriga de entregar ao Ministerio de Cultura unha táboa estatística que nos serve para ver como medramos. E vemos como todos os anos aumentan os préstamos. Este é o maior aliciente, que seguimos medrando. Incluso nas actividades que organizamos hai listas de espera. Todos os venres quedan fora nenos. Iso é significativo de algo.

-Cal é a importancia dos voluntarios na biblioteca?

-Esencial. Cando se fala de voluntariado, moitos pensan que unicamente son rapaces que veñen traballar aquí, pero é moito máis que iso. Son a imaxe da biblioteca, é o que perciben os nenos que veñen as actividades de contacontos. Cando un neno conta a outro un conto é moito máis receptivo que cando o conto eu, por exemplo. A atención é exponencial. Iso por un lado. E segundo, os voluntarios reflicten valores que os nenos ven. E cando son maiores, xa din que tamén queren ser voluntarios. Moitos teñen que irse de Verín, porque seguen os seus estudios, son universitarios, e os seus postos na biblioteca son ocupados por outros. Isto é constante. Se está retroalimentando e está sendo un espello. Non son unicamente rapaces que colaboran senón que crean un valor de cultura altruísta que é importante. Que na sociedade actual existan estes rapaces é fundamental.

-E eles teñen tamén ese sentimento pola biblioteca?

- O sentimento que teñen os voluntarios é incrible. Hai maiores que ata o poñen no seu currículo como algo moi importante, como algo engadido a súa formación académica, a súa participación na biblioteca de Verín. Iso é un orgullo para nós e para eles, que presumen diso. Acaban sendo os nosos nenos, coñecemos as súas teimas, os seus gustos e pasan a formar parte case das nosas familias.

«Hoxe xa podemos dicir que somos un centro cultural que presta libros»

A biblioteca municipal de Verín non é so un espazo pensado para os máis pequenos. O centro é un lugar de referencia para os adultos que buscan un espazo cultural.

-Que outras actividades para adultos destacaría?

-Hai anos que empezamos co tema da dinamización da cultura tamén a nivel adulto, con conferencias ou exposicións. Xeramos un hábito nos adultos que regularmente veñen para saber que hai na biblioteca programado. Queremos adaptala a un centro cultural. Dar ese salto. Para nós o importante é estar integrado na sociedade e ser atraínte, xerar unha serie de actividades que leven a ser un centro que chama atención. Antes eramos unha biblioteca con actividade culturais e hoxe podemos dicir que somos un centro cultural que ten unha biblioteca. Ese cambio é un matiz que o di todo. Un cambio total de mentalidade.

-Que actividade destacaría neste ano?

-Tivemos dúas cousas moi importantes, a maiores de todo o demais. Recibimos una doazón de 2.000 reproducións dos semanarios antigos de Verín de 1893 a 1936, das cabeceiras que existían, e tamén da biblioteca persoal do fillo de Taboada Chivite. Neste momento o goberno municipal tivo a sensibilidade, porque non tiñamos tempo, de pór a alguén máis axudándonos neste tema. Tivemos que facer o rexistro, a catalogación un por un dos xornais, a dixitalización e obtención de metadatos e subida en web. Ademais de manter o ritmo das actividades que son habituais. Isto non para. Entramos nunha dinámica que, aínda que nós quixésemos, non poderiamos deixar de facer cousas.

-Que obxectivos se marca no futuro?

-A curto e medio e prazo simplemente continuar co que facemos na biblioteca, da mellor maneira posible.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Vicente Rodríguez Justo: «Competir contra a PlayStation é moi difícil, pero é posible»