Julio Quiroga, produtor de aceite: «Este ano empezamos a recoller un mes e medio antes que no 2016»


monforte / la voz

Julio Quiroga é copropietario de Ouro Quiroga, unha das empresas creadas nos últimos anos neste municipio para recuperar a tradicional produción de aceite e sacarlle rendemento industrial. Igual que no resto das áreas produtoras de Galicia, a colleita de olivas en Quiroga vén marcada pola seca. Ouro Quiroga, Adegas Mondelo e Val de Quiroga, as tres empresas con sede na comarca de Quiroga que comercializan cantidades significativas de aceite, sacan á venda cada ano entre 2.500 e 3.000 litros, en conxunto.

-Xa están recollendo a oliva este ano?

-Xa empezamos hai case vinte días, a primeiros de outubro. Ou sexa, un mes e medio antes que o ano pasado. As primeiras en madurar foron as dúas variedades autóctonas, a brava e a mansa.

-Fan aceite unicamente de variedades autóctonas?

-Temos unha liña de aceite só con esas variedades, pero tamén outra plurivarietal feita tamén con arbequina. Estamos dentro da asociación de produtores de aceituna de Galicia, e dentro dese colectivo participamos nun proxecto de investigación a través de fundación Juana de Vega e o CSIC para caracterizar as variedades autóctonas. Esa é a liña pola que apostamos.

-Non é o habitual.

-Non. As oliveiras plantadas estes últimos anos son case todas de arbequina, unha variedade moi consolidada.

-¿Canta superficie teñen plantada?

-Entre catro e cinco hectáreas, pero repartidas en propiedades pequenas e dispersas. Estamos recuperando oliveiras vellas que se encontraban abandonadas nos municipios de Ribas de Sil e Quiroga.

-E como se presenta a colleita nun ano tan seco como este?

-Pensamos que a nosa produción vai ser máis ou menos como a do ano pasado, que rondou os 1.500 litros en total. Pode que incluso sexa un pouquiño maior, porque temos algunha plantación nova que xa empeza a dar. En todo caso, aínda estamos recollendo e non se sabe. A colleita é lenta, porque imos seleccionando en función da variedade de oliva e nas oliveiras hai mestura. A colleita das variedades autóctonas xa a rematamos e agora estamos coas demais. Eu penso que acabaremos a semana que vén. A oliva está vindo en bo estado. Fixéronlle ben as choivas. Non estas últimas, senón as anteriores.

-Venden a oliva que lles sobra?

-Non vendemos, porque nós aproveitámola toda. E tampouco compramos, máis que algunha cousa puntual. O que si facemos é moer por encargo nas nosas instalacións, tanto a propietarios de oliveiras desta zona que queren o aceite para autoconsumo como aos donos das plantacións grandes novas que se fixeron nos últimos tempos e que agora están empezando a producir, sobre todo na provincia de Ourense e nos arredores da Estrada.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Julio Quiroga, produtor de aceite: «Este ano empezamos a recoller un mes e medio antes que no 2016»