La Voz informou da presenza en Galicia de «terras raras» (neodimio, escandio, disprosio, europio...). A importancia destes elementos químicos foi crecendo desde que a electrónica pasou de funcionar en base a válvulas de baleiro a facelo sobre dispositivos de estado sólido cada ano máis complexos e diminutos. Mais non por iso deixaron de importar outros elementos da táboa periódica como cobre, ouro, estaño, ferro ou aluminio, acompañados de compostos como os diferentes plásticos que forman parte dos aparellos; por non falar de compoñentes vulgares para as embalaxes de equipamento acabado.
A industria electrónica non é consumidora de grandes cantidades de recursos naturais por cada produto que fabrica, mais éo en conxunto pola cantidade de aparellos que produce no mundo. Na última edición do ISE (Integrated Systems Europe) chamaba a atención o espazo da Samsung dedicado á «sustentabilidade cotiá». O xigante coreano adiántase aos seus competidores no empeño de aforrar desde silicio ata colas, e reciclar mesmo papel. Xeitosamente, vístese de verde ao tempo que aumenta marxes de ganancia.