O programa de visitas turísticas e ambientais Km0, promovido pola Deputación, ábrese a partir de agora aos centros educativos da provincia. Os primeiros en participar nestes percorridos son os alumnos do o colexio sarriao de La Asunción, que tiveron onte ocasión de visitar un treito da vía romana XIX no municipio de Pedrafita do Cebreiro. Antes de efectuar a excursión, foron recibidos na sede do organismo provincial polo seu presidente, José Ramón Gómez Besteiro, quen destacou ante os rapaces a importancia do patrimonio natural da provincia. Un segundo grupo de escolares deste mesmo centro sarriao realizará hoxe outro percorrido por este mesmo itinerario.
O colexio público de Taboada e o instituto de ensino secundario de Quiroga están inscritos tamén neste programa. Na primeira temporada dirixida a escolares participan ademais os colexios lucenses Rosalía de Castro, María Auxiliadora e Divino Maestro e centros educativos de Meira, Castroverde, Becerreá e A Pastoriza.
1.500 participantes
Por outro lado, dentro deste mesmo programa, un grupo de 55 visitantes individuais visitarán hoxe diversos lugares de interes do municipio de Cervo. Desde que se puxo en marcha a iniciativa, unhas 1.500 persoas participaron nestes percorridos, unha boa parte dos cales se desenvolveu en municipios da Ribeira Sacra.
Os participantes no programa Km0 poden escoller entre 88 rutas por diferentes lugares da provincia. Ata agora, nestas excursións guiadas participaron membros de asociacións veciñais e culturais e solicitantes a título individual.