Música, cinema, xogos e a lingua galega axudan aos alumnos lucenses a aprender portugués

Laura López LUGO / LA VOZ

MONFORTE DE LEMOS

Presentación dos obradoiros de portugués
Presentación dos obradoiros de portugués

A Associaçom Galega da Lingua e a Vicepresidencia da Deputación organizan 25 obradoiros en trece centros educativos da provincia

05 may 2021 . Actualizado a las 10:56 h.

A Associaçom Galega da Língua (AGAL) desenvolverá 25 obradoiros de achegamento ao portugués en trece centros educativos da provincia, da man da Vicepresidencia da Deputación de LugoA vicepresidenta, Maite Ferreiro, e o presidente de AGAL, Edudardo Maragoto, presentaron no Pazo de San Marcos esta iniciaitiva que achega ao alumnado lucense unha actividade formativa que AGAL está a levar a cabo noutros concellos de todo o país.

Os obradoiros, que se desenvolven baixo o epígrafe O Português Simples-OPS teñen como obxectivo descubrir ao alumnado a vantaxe do galego para aprender portugués e acceder ao mundo que se expresa nesa lingua, a sexta do mundo en falantes.

Eduardo Maragato explicou que se trata «de obradoiros de cen minutos nos que se ofrece unha formación básica en portugués con actividades amenas, en que se usa a interactividade e ferramentas moi interesantes para o alumnado como a música, para mostrar que a aprendizaxe do portugués é moi facil para os galegos».

A vicepresidenta Maite Ferreiro sinalou que «como falantes de galego, formamos parte dun sistema lingüístico compartido con 240 millóns de habitantes, unha porta aberta ao mundo que cremos que debemos empregar máis a todos os niveis, cultural, social, económico. O coñecemento que fomentan estes obradoiros de AGAL son un paso nesa dirección, por iso apostamos por apoiar a iniciativa».

Os obradoiros contan con catro bloques de contidos, que pretenden un achegamento á ortografía e ao léxico portugués a través do coñecemento que proporciona o galego para amosar a vantaxe competitiva que temos en termos de comprensión escrita a hora de aprender portugués.

Ademais, informan do que a lusofonía representa en termos xeográficos, culturais e económicos, contribuíndo a tomar consciencia do que descoñecemos dos países que falan portugués. Tamén fornecen recursos para que os alumnos e alumnas sexan autonómas na aprendizaxe, poñéndoas en contactos con diferentes recursos culturais, desde música ou cinema ata xornais e xogos.

O IES Díaz Castro de Gutiriz acolle o día 5 un dos obradoiros

Os obradoiros, que comezaron a desenvolverse o pasado 21 de abril no IES do Camiño, de Palas de Rei, chegarán o día 5 ao IES Poeta Díaz Castro de Guitiriz, que fai coincidir a sesión coa celebración do Día da Lingua Portuguesa.

Nos vindeiros meses, os obradoiros chegarán a outros once centros: o IES Fontem Albei da Fonsagrada, o IES Enrique Muruais da Pontenova, o IES Pedregal de Irima de Meira, o IES de Becerreá, o IES Lama das Quendas de Chantada, o CPI Dr. López Suárez do Saviñao, o IES Río Cabe de Monforte, o IES Xograr Afonso Gómez de Sarria, o IES Perdouro de Burela e o IES Vilar Ponte de Viveiro.