Nesta casa de Chantada viviron... un dos mellores escultores galegos e a súa irmá tecedeira

No lugar de Penelas, pertencente á parroquia chantadina de Esmeriz, está a coñecida como Casa da Fonte. E así rezaban debaixo do seu nome as tarxetas de visita de Eduardo Rodríguez Osorio, un dos escultores galegos máis afamados do século XX. E esa foi tamén a casa familiar da súa irmá Elvira, a derradeira tecedeira de Esmeriz.

Eduardo Rodríguez Osorio naceu nesa casa de Chantada o 5 de marzo de 1920. Formouse como escultor na Escola de Artes e Oficios de Santiago, na Escola Superior de Belas Artes de San Fernando en Madrid na Escola Superior de Belas Artes de Santa Isabel de Hungría, en Sevilla, onde realizou estudos de imaxinería religiosa. Da súa obra son especialmente valorados os retratos de personaxes do século pasado, coa maioría dos cales tiña ademais unha relación de amizade.

Cando el faleceu en madrid en 1995, a súa irmá Elvira Rodríguez Osorio seguía vivindo na Casa da Fonte. Alí morreu aos 102 anos en febreiro do 2014. Era coñecida en Chantada como a tecedeira da Casa da Fonte, en referencia á súa vivenda familiar e ao oficio artesanal no que traballou durante a maior parte da súa vida. Aprendeu a tecer de nova empregando teares tradicionais e esa foi a ferramente que preferiu usar o resto da súa vida.

---

---

---