Edelmiro López: «O problema non é o eucalipto, é o eucalipto caótico, sen coidar»

Profesor de Economía Aplicada, aposta por atacar a base do problema dos incendios: a ordenación do territorio e a política forestal


santiago / la voz

O profesor da USC Edelmiro López foi un dos membros da comisión que analizou as causas dos grandes incendios deste primavera en Portugal.

-5.600 efectivos despregados en Galicia. ¿Son abondo?

-Non é un problema de máis medios humanos. Máis importante que se tes 5.000, 6.000 ou 50.000 é que incorpores máis o coñecemento sobre clima, sobre vexetación, e planificar moito mellor as actuacións, aparte de intervir sobre os factores estruturais.

-¿Que tipo de perfís habería que incorporar?

-Hai magníficos directores de operacións nos incendios. Dáme a sensación de que o que falta é o cruce entre meteoroloxía e territorio, que é cada vez máis importante: incorporar coñecemento fino sobre as condicións meteorolóxicas para a planificación das operacións. E sobre todo, no caso galego, asegurar que ese persoal cualificado ten realmente o control de todo o dispositivo. Seguir segmentando resta operatividade ao dispositivo.

-Pero o máis perigoso son esas condicións estruturais: vexetación, clima e ordenación do territorio.

-Paréceme que o discurso que estamos mercando do terrorismo incendiario é humano, pero impide un debate racional sobre un problema que temos na sociedade galega e afecta ao Goberno, porque non se fai cumprir a normativa sobre a limpeza dos núcleos e non se modifica a política forestal cando sabemos que temos un problema. Pero non só afecta ao Goberno, afecta ao cidadán: sabe que hai unha normativa que lle impide plantar piñeiros e eucaliptos a menos de 50 metros das casas, e cando lla fan cumprir quéixase.

-Así que a culpa de que arda Galicia é dos galegos.

-Dos galegos, si, empezando por aqueles que teñen máis responsabilidade, porque teñen capacidade de establecer as normas e de facelas cumprir, pero tamén de cada un dos cidadáns, evidentemente. Temos un problema complexo que se está simplificando. E non é o eucalipto nin a trama incendiaria. Vas collendo todos os factores e cada un pode ter parte de verdade, pero ningún é o factor determinante.

-Non é cuestión de especies.

-O eucalipto é unha especie pirófita, favorece o fogo no monte e que se transmita a máis distancia, e esténdese co lume. Todo iso é certo, pero a experiencia indica que onde hai plantacións de eucalipto ben coidadas non arde. O problema non é o eucalipto, é o eucalipto caótico, sen coidar.

-Fala de ordenación do rural.

-Necesitamos non digo xa repoboar o rural, pero si xestionar o territorio no rural, se non hai xente que estea disposta a vivir todo o ano, mirar quen pode xestionar de forma adecuada o territorio. Necesitamos cumprir as normas que establecemos, tanto as urbanísticas como as de prevención estrutural de incendios.

-Atacar a base do problema.

-Si. A ordenación do territorio. Que afecta ao uso forestal: recuperar terreos agrícolas e controlar o crecemento incontrolado de edificacións cara ao monte.

-Tamén se critica que non hai política forestal.

-O que non hai é unha definición de cara a onde queremos ir e a aplicación de políticas de acordo con iso. A proba máis evidente é que, cando un ve o que prevía o plan do 92 e o que hai agora, ve que non se parecen en nada. A solución aos problemas que temos non pasa polo DOG, porque boa parte dos problemas que comentei: ordenación do territorio, medidas de prevención estrutural de protección de núcleos, necesidade de limpeza arredor das entradas... iso xa está, pero non se leva a cumprimento.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
23 votos
Comentarios

Edelmiro López: «O problema non é o eucalipto, é o eucalipto caótico, sen coidar»