A maternidade como ferida aberta

«O libro da filla», de Inma López Silva, é un espello brutal da realidade actual que pescuda nas sombras e as mentiras das «mellores» familias


As «malas nais» que superan os 40 serán das primeiras -pero non as únicas-, en sentirse sinaladas co dedo por O libro da filla, a novela coa que, escritora Inma López Silva (Santiago, 1978) volve ás librarías, á vez en galego e en castelán (editoriais Galaxia e Lumen), tras deixar en coiros o machismo coloquial e o académico en Chámame señora, pero trátame coma a un señor. A ollada diseccionadora, impúdica e mordaz da autora, capaz de despezar nunha escena o corpo da realidade actual, é recoñecible neste thriller interior e sociolóxico. Se entran, quedarán pendurados do ritmo, do rock das idas e voltas e as dúbidas ás que nos enfronta o relato a varias voces, un tapiz que argallan, con fíos soltos, dúas nais e dúas fillas, pais atrapados na arañeira da peor das sospeitas; e que debe completar cos seus vimbios cada lector. López Silva dispara de fronte, perturba cun obxectivo, sen ocultarse, nas catro pezas que compoñen O libro da filla, catro mais o epílogo, unha luz, esperanza no inferno dos abusos e a dor inflixida na infancia polos da casa. Hai algo no relato que o emparenta, sangue da literatura, coa Brenda Navarro de Casas vacías ou La casa del padre, de Karmele Jaio. Pero o poético nesta novela coma un reportaxe de investigación sen límites só vén da man dos versos (para gardar) de Olga Novo e Ismael Ramos.

Unha trama de abusos

Comeza soando ben. Será que a primeira en recibirnos é esa canción de The Smiths, There is a light that never goes out, con significado na vida de Helena Sánchez, xornalista estrela que mete os fociños en todo, látego do poder e a súa voracidade. Helena é unha nai (ausente) tan diferente coma calquera, real, sensual, imperfecta, valente, ás veces desnortada, fea, anota a autora, no medio dun sándwich entre o deber e o desexo. Unha muller entre a espada do vínculo máis forte e a parede da súa identidade individual. Unha muller de máis de 40 que se atopa nunha encrucillada vital e profesional, e que investiga o caso de Fernando, condenado pola violación da máis pequena das súas fillas. Esta é a trama que manda neste libro trepidante e molesto, radicalmente intenso, que acaba entretecida no avance coa trama da propia vida de Helena, a relación co seu pai, enfermo de Alzheimer; co «marido ideal» que di que a quere «bastante», cos amantes que lle dan aire na vida, co seu divorcio, cunha vella amiga traizoeira, e cunha filla adolescente, Amanda, que comeza a desaparecer e vén ser, en realidade, a ferida aberta máis grande de Helena, o abismo desde o que terá que asomarse aos seus baleiros e sombras, ao diaño que rabuña no interior.

As referencias á política, á corrupción, ao avance da extrema dereita, ou á precariedade laboral e afectiva que espella o patchwork social non son ficción, ou non de todo, percibirá o lector deste noir de interiores feminista baseado, no arrinque, nun caso real de agresión sexual.

É duro escoitalo «falar» a el, a eles, pais que supostamente estragaron a infancia das súas fillas, nesta novela, na que recoñecemos trazos e gustos de López Silva. Como é duro dubidar, tocar a ausencia e o sentimento de culpa das mulleres, os seus intereses; ler cos ollos de xeo do escéptico sentimental, que quere aplacar as emocións primarias para coñecer, da man desta caixa de relatos, a verdade. A verdade, esa muller que pode ser libre, pero que non ten instinto maternal.

A voz (e a personaxe) de Helena é sen dúbida a máis potente deste k.o. de Inma López Silva aos silencios establecidos por gorecer os intereses dun sistema (o matrimonio, a familia, o de pensamento, o político). Os wasaps (e os emoticonos) e o ioga son parte da linguaxe, esperta, moi actual, mais cun aire a Brummel que aprezarán os nacidos a finais dos setenta, dunha autora que se mantén fiel á súa voz para enfrontarnos ao conflito da maternidade, que quere o vínculo, pero non a cadea. E teima por rompela para que mande, sen abuso, o amor.

O libro da filla

INMA LÓPEZ SILVA

EDITORIAL Galaxia, 484 páxinas24 euros

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

A maternidade como ferida aberta