O cómic poético de Yolanda Castaño

Unha orixinal proposta desta autora que, sen deixar de transitar pola súa estética clásica, fai interactuar a poesía co cómic, do mesmo xeito que noutras ocasións se achegara á música, á plástica ou ao audiovisual


Á marxe de que á hibridación entre dous códigos como son a poesía e a banda deseñada se lle poden procurar antecedentes en manuscritos iluminados, por poñer un exemplo, o certo é que o denominado Comic Poetry, ou cómic poético, que goza de certa atención fundamentalmente no ámbito anglosaxón, chega agora a nós grazas a Yolanda Castaño, poeta de extenso e recoñecido currículo, sempre á caza das posibilidades que pode encerrar a difusión do feito poético, como testemuña o activismo nesta causa reflectido nas loables iniciativas en que desempeña un papel fundamental, como son a organización e coordinación tanto de Poetas Di(n)versos, na cidade da Coruña, como o seu papel no Obradoiro Internacional de Tradución Poética, que se celebra na illa de San Simón.

A autora de A segunda lingua, seguindo o ronsel de procurar eses elementos de confluencia entre poesía e outras artes, como xa fixo no seu día coa música, a plástica ou o audiovisual, decide antologar vinte e cinco anos de traballo continuado e concentralos en corenta composicións que, cos ollos postos na inauguración deste xénero do cómic poético, distribúe entre artistas de banda deseñada para que interpreten, sen imposicións de ningún tipo, á súa maneira e co seu propio estilo, o poema asignado nunha soa páxina. O resultado desta orixinal iniciativa é, a todas luces, espléndido, ao que axuda non pouco o acaído tratamento estético que se lle outorgou ao libro e que posibilita, por unha banda, asistir e gorentar a algunhas das claves da estética pola que Castaño vén transitando desde o seu primeiro libro ata hoxe -velaí o erotismo, a visión do corpo e a imaxe, a querenza polo visionario e o onírico ou a alteridade, entre outras- e, ao tempo, reparar nas talentosas interpretacións que esas corenta relevantes sinaturas da banda deseñada realizan das composicións da autora coruñesa, sempre sorprendentes e heteroxéneas. O exercicio desta interacción entre poesía e banda deseñada inaugura un camiño suxestivo e sedutor que leva aparelladas canda si múltiples posibilidades de todo tipo. Sexa benvida esta proposta.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

O cómic poético de Yolanda Castaño