«Rivera é o Ícaro da política»

O libro do estradense, que chega nestes días ás librerías locais, preséntase no MOME o xoves día 28


a estrada / la voz

Manuel Anxo Rei Chao (A Estrada, 1947) vén de rematar No Goberno dos milagres, o segundo título da súa triloxía Ao paso da política. Abarca o período previo á moción que derribou a Rajoy ata a convocatoria das eleccións do pasado domingo en 90 artigos. Prevé pechar o círculo co último título antes do vindeiro verán, «cando estea a lexislatura ou finiquitada ou consolidada».

-Pouco tempo lle augura...

-Hai moitas incertezas. Eu teño a esperanza de que poida durar, pero o conflito catalán vai ser determinante para saber se a lexislatura durará ou non os catro anos. Eu penso que vai depender, fundamentalmente, de como se enfoque a cuestión catalá.

-Que lle parecen os resultados do 10N na Estrada?

-Reproducen os de anteriores comicios. É como unha sociedade moi pouco permeable aos cambios sociais de España e internacionais. É como se tardase en reaccionar a eles.

-Como xorde a súa triloxía?

-A triloxía parte da idea de que a democracia liberal defende os valores da liberdade, pero contrólaa mediante mecanismos sutís, como a falta de transparencia, información falsa ou redución ao máximo da participación cidadá, evitando o control social dos cidadáns cara aos representantes políticos. Cuestións que provocan que se produzan desigualdades, privilexios ou incluso corrupción. Son temas dunha grande debilidade lexislativa, e aos que voluntariamente os políticos non lle meten man a fondo.

-Que aborda no libro?

-Analiza o decorrer político da moción de censura que derrubou a Rajoy ata hoxe, e ao tempo analiza determinado tipo de fenómenos nacionais e internacionais que poden darlle un selo característico á lexislatura.

-Con referencias históricas?

-Para ese análise recorro a unha serie de analoxías con anécdotas e feitos históricos, refráns, proverbios e determinados acontecementos do pasado que nos poden ilustrar para interpretar mellor a realidade que vivimos: busca converter o acontecer político en historias para salvalo do esquecemento. Por exemplo, o voo de Ícaro cando Dédalo lle constrúe as ás unindo con cera as plumas, emprende o voo e, a pesar de ser advertido de non aproximarse ao sol para non derretelas, voa tan alto que cae das alturas ao mar. Algo parecido é o que lle pasou a Albert Rivera, que pretendeu sorpassar ao PP para ser líder da dereita e esnafrouse. Unha caída semellante á da UCD.

-A temática no libro é múltiple.

-Trata desde o asasinato do periodista Khashoggi no consulado de Arabia Saudita ao brexit ou a crise venezolana. Ou o máster de Cifuentes e a exhumación de Franco, lembrando o que altos xefes da Armada dixeran ao rei preocupados polo proceso democrático, dicindo que Franco non o permitiría; seguro que tampouco a exhumación, faltoulles dicir.

-Por que ese título?

-Porque é inconcibible que un partido con 85 escanos puidera facerse co Goberno de España. Tivo que recorrer ao decreto lei e a alianzas moi problemáticas para que a lexislatura funcionase. E aínda así non logrou aprobar os Presupostos, polo que tivo que convocar as eleccións de abril e novembro. Recorreu a medidas sociais como equiparar pensións ao IPC ou universalizar a sanidade, que se poden considerar milagreiras, e que de seguir Rajoy no Goberno serían impensables.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«Rivera é o Ícaro da política»