Abe Rábade: «O meu ideal é integrar estilos musicais, os prexuízos entre eles escandalízanme»

Montse García SANTIAGO / LA VOZ

CULTURA

Rábade presentou o proxecto audiovisual «Piano solo entre árbores» xunto a Rosa Salgado e Valentín García Sandra Alonso

O pianista compostelán de jazz publica o álbum «Sorte» e vén de gravar co cantante portugués Salvador Sobral

22 ene 2021 . Actualizado a las 05:00 h.

O pianista Abe Rábade (Santiago, 1977) está de estrea estes días. Este xoves presentaba Piano solo entre árbores, un proxecto audiovisual da man da cooperativa Miraxe no que interpreta catro pezas de jazz nun espazo arborado de Rianxo, e só un día despois ve a luz Sorte, o seu décimo cuarto traballo discográfico conformado integramente por composicións orixinais. Ademais, hai uns días estivo en Francia participando na gravación do novo traballo do músico portugués Salvador Sobral, con quen xa participara nunha xira e compartiu proxectos; e xa está avanzando no que será o seu décimo quinto disco, Botánica, do que presentou algún avance, como un tema con Davide Salvado. Será un traballo dedicado ás árbores.

Regístrate gratis y recibe cada mañana en tu correo las principales noticias del día

O disco Sorte ten a súa orixe en outubro do 2018. «En tres semanas escribín todo o material como un arrouto. Foi algo moi pouco habitual», explica o músico. A partir de aí iniciou un proceso de observación para ver cal era a esencia anímica de cada peza, dándolle en función diso un título, que, a súa vez, aportou novos matices ás doce composicións que compoñen este traballo que gravou xunto os dous compoñentes do seu trío, Pablo Martín Caminero (contrabaixo) e Bruno Pedroso (batería), que tamén fixeron as súas achegas ao resultado final.

Pero, como definiría Sorte? «É unha xornada moi intensa das nosas vidas. É levar a disco un día moi intenso, con todo o que a intensidade quere dicir, incluíndo, polo tanto, o descanso, a introspección, non é só a felicidade», responde Abe Rábade, que detalla que a elección do título responde «a toda a polisemia da palabra sorte», non só polo que respecta a un resultado do azar, senón tamén a outras acepcións, como pode ser a referencia ás témporas.

As doce composicións de Sorte están agrupadas de tres en tres, a modo de trípticos pictóricos -«gústame facer xogos con outras disciplinas artísticas»-, e van describindo as diferentes partes do día, desde Orballo, que abre o primeiro tríptico denominado Sorte mística, ata Retorno, que pecha o de Sorte lúdica. Un traballo no que se dan a man desde a música clásica ao blues, pasando pola influencia da música tradicional galega e, como non, os elementos propios do jazz. «O meu ideal é integrar estilos musicais porque as linguaxes híbridas son as máis interesantes. Os prexuízos entre estilos é algo que me escandaliza», asegura este recoñecido intérprete de jazz, que engade que «na música hai unha tendencia xeral a integrar estilos e tamén épocas estilísticas, hai unha vontade moito maior que no resto da sociedade. Creo que o sistemas artísticos son a avanzadilla dunha maneira de pensar». Nese senso, reivindica a gran riqueza rítmica da música tradicional galega.

Sorte, se a situación sanitaria o permite, será estreado en directo o 11 de febreiro no Teatro Principal de Santiago. Ao día seguinte recalará en Oviedo; o día 13, en Salamanca; e o 20 chegará ao madrileño Auditorio Nacional de Música.

Pero á vez que Sorte dá os primeiros pasos, Abe Rábade presentou onte o proxecto audiovisual Piano solo entre árbores, no que interpreta catro pezas jazzísticas nas que traballou durante o confinamento. O concerto foi gravado en Asados, Rianxo, o 4 de novembro, e nace dunha proposta que lle fixo a cooperativa Miraxe co obxectivo de reivindicar aos técnicos galegos durante a pandemia ao abeiro do Fondo de Proxectos Culturais Xacobeo 2021. «O frío condicionou a gravación. No jazz a mestría máis grande está na adaptación a este contexto», di o pianista. O concerto pode verse xa a través do Portal da Lingua Galega. Precisamente, o director xeral de Política Lingüística, Valentín García, salientou como a lingua galega se pode integrar en estilos que chegan de fóra.

Esta presentación chegou para Rábade só uns días despois de participar na gravación do novo álbum do portugués Salvador Sobral. «Foi unha experiencia formidable», enxalza. Tamén se sumou a catro concertos do cantante e prevé repetir en maio.