«Nosoutras» amosa o interese de María Victoria Moreno por dignificar as mulleres

A editorial Urco trouxo á vida un libro de relatos, moitos deles inéditos, da autora homenaxeada das Letras Galegas


pontevedra / la voz

Dicía recentemente Begoña, a filla de María Victoria Moreno, que o feito de que as Letras Galegas se lle dedicasen a súa nai fíxolle descubrir moitas cousas dela que descoñecía. «Eu sempre a vin principalmente como nai e agora, en gran parte, descúbroa como autora e como unha muller comprometida, inmensa...», explicaba Begoña nunha entrevista, case como xustificándose. Esa sensación, a de estar a descubrir a unha persoa moi brava, moi xenuína e moi xusta, á par dunha enorme narradora, téñena tamén moitas outras persoas. Afortunadamente, aínda que o 17 de maio xa quedou atrás, cada día xorden novas oportunidades de coñecer un pouco máis a María Victoria Moreno. Quedou demostrado onte en Pontevedra, onde se deu a benvida a unha criatura literaria da súa autoría: Nosoutras. Trátase dun libro de relatos, boa parte deles inéditos, que forma parte da fermosa e valente aposta da editorial Urco por darlle visibilidade a María Victoria Moreno.

En Nosoutras, María Victoria Moreno fai protagonistas ás mulleres. Fala de mulleres que aturan, de mulleres que calan e doutras que se rebelan. Fala de mulleres que sufrían antes e que sofren agora porque, desafortunadamente, as historias que conta seguen vixentes. María Victoria, en realidade, escribía como vivía. E vivía como era. E como era? Era puro compromiso. Pura liberdade. E iso leváballe a dignificar ás persoas en xeral e ás mulleres en particular a través da súa escrita. Lembrouno onte, nunha entrañable presentación do seu libro, a concelleira pontevedresa Anabel Gulías, que foi alumna súa: «Era cómplice dos estudantes, ensinábate a pensar por ti mesma, a ser libre», dixo.

Palabras semellantes saíron tamén da boca de Andrea Jamardo, de Urco, que apostou por editar as obras de María Victoria cando a RAG aínda non decidira dedicarlle as Letras Galegas. «Creo que foi a mellor decisión que tomei na miña vida», indicou Jamardo, que reivindicou a importancia da literatura infantil e xuvenil que tanto identifica a María Victoria, e dixo que a do 17 de maio foi «unha homenaxe de xustiza a unha autora case esquecida». Na presentación falou tamén Xavier Senín, que traduciu do castelán ao galego algún dos relatos de Nosoutras e que fixo algo aínda máis importante: como amigo de María Victoria, convenceuna para que nunca deixara de escribir. Foi unha presentación intimista, emotiva, máis de andar pola casa ca de salón literario. Nin que a tivese organizado María Victoria.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

«Nosoutras» amosa o interese de María Victoria Moreno por dignificar as mulleres