Unha mostra fotográfica homenaxea aos veciños máis senlleiros
04 nov 2014 . Actualizado a las 05:00 h.Desde hai máis de tres décadas, as expropiacións deixaron asediado ao pobo de Elviña-Castro, que pouco a pouco quedou reducido a un pequeno recuncho á entrada da cidade rodeado de edificios universitarios, das altas torres de Someso e do futuro parque ofimático. Entre todas estas construcións sobrevive un núcleo con pequenas casas -moitas delas pechadas xa a cal e canto-, que aínda conserva a esencia dese «remanso de paz» que sempre foi este barrio coruñés.
Para homenaxear e lembrar aos veciños que manteñen viva a historia desta zona, a asociación cultural Tempo Novo decidiu organizar unha exposición fotográfica cos rostros dos residentes maiores de 65 años, que bautizou co título A nosa xente. Xoán Romeu, neto, fillo e veciño de Elviña, foi o encargado de poñer as caras a esta mostra, un traballo que comezou hai varios meses e que xa deu os seus primeiros froitos. «Vou casa por casa, polos camiños, falo coa xente e fágolles o retrato. Busco sempre que sexan poses naturais, e como me coñecen, hai máis naturalidade e menos desconfianza», recoñece o fotógrafo, que xa retratou a uns 35 veciños, pero aínda lle quedan outros 70.
Como media, Romeu retrata a unhas tres ou catro persoas á semana, pero todo depende un pouco do tempo que faga, xa que lle gusta moito tomar imaxes no exterior, e que poidan transmitir algo do pobo de Elviña-Castro e do seu protagonista. Outra das teimas deste fotógrafo é que «os retratos gústanme que sexan en branco e negro, porque así tamén son unha homenaxe á xente que falta».
O obxectivo de todo este traballo é que estea listo para o vindeiro 1 de maio, onde se espera que todos os veciños maiores de 65 años ocupen o seu espazo nas paredes do local da asociación Tempo Novo, que nesa data festexa os seus primeiros trinta anos de vida.
Aniversario
O presidente do colectivo, Samuel López, explicou que esta mostra quere servir para festexar estas tres décadas da entidade cultural, pero tamén «porque é unha forma de dicir que aquí se seguen facendo cousas, porque os problemas veñen por todos os lados, pero aquí seguimos loitando».
De feito, esta asociación non deixa de traballar, e todos os anos organiza multitude de cursos e clases de todo tipo, sobre todo de música, xa que gaiteiros tan famosos como Susana Seivane ou Bieito Romero pasaron polas súas aulas.