Os pequenos serán os protagonistas de hoxe nos colexios, mais xa hai outras citas nos almanaques: pasarrúas, pinchos, festas e demais
13 feb 2026 . Actualizado a las 05:00 h.Hoxe • Cocidos mediante xa celebrados, hoxe bota a andar oficialmente o entroido na Costa da Morte. A expensas do tempo, os escolares serán hoxe en gran medida os protagonistas. Sairán en desfile e pasarrúas alí onde se poida e refuxiaranse en pavillóns onde sexa preciso. En Malpica, dúas citas: pasarrúas do colexio Milladoiro (10.45) e o do Joaquín Rodríguez Otero de Buño (11.00).
Carballo • En agarda da xornada grande do domingo, co concurso, ou mesmo de citas como o Renacemento do Chorón mañá na Milagrosa, o entroido no centro de Carballo comeza esta tarde con animación nas rúas. Cé Orquestra Pantasma visitará a Praza do Concello a partir das 18.30, e partir das 20.00 será a quenda de Brassica Rapa, música instrumental e vocal con multipercusión. A gozar!
Corcubión • A vila tira do saber promovendo hoxe neste arranque do entroido un Roteiro de Pinchos no que participan os locais Carrumeiro, O Ribeiro, Suíza, Alborada, Buen Camino, Mar Viva e O Sirena. A mediodía, de 13.00 a 15.30. Pola noite, de 20.00 a 23.00 horas. Amenizará a charanga O Rumbo en horario vespertino. De completar cinco cuños noutros tantos locais, entrarase no sorteo de 100 euros para gastar nos negocios participantes.
Camariñas • Festa de entroido da ANPA O Areal, no pavillón Víctor Vigo, ás 17.00. Doutro lado, a comisión de festas da Ponte do Porto promove para esta noite unha «Pijamada Party» no pub Palma Nova. Terán DJ e música á carta cos temas solicitados.
Buxantes (Dumbría) • A asociación Fonte Santa reúne as clases de música tradicional na celebración do entroido: 19.00, na Casa Cultural de Buxantes.
O mal tempo leva a adiar os desfiles de hoxe en Fisterra
Os desfiles dos centros educativos de Fisterra e Sardiñeiro previstos para hoxe foron adiados polo mal tempo. Será o día 20, ás 10.30 horas, cando enchan as rúas de cor e ledicia o colexio Mar de Fóra, a Escola A Galiña Azul e o CEIP Areouta. Pola súa banda, o colexio Nuestra Señora del Carmen de Fisterra informará proximamente do día no que fará o seu desfile.