Canteira, «e da boa!», para a regueifa e o baile

«Haivos canteira na Costa da Morte... e da boa!», conclúen dende o instituto Pedra da Aguia de A Ponte do Porto, Camariñas, sede este mércores da xornada de ida da segunda Liga Escolar de Regueifa e do Encontro Bergantiñán. «Expresións ancestrais da nosa cultura con torgos actuais e modernos acenos»: ben se pode resumir así unha xornada na que o alumnado anfitrión recibiu a un cento de mozos de Bergantiños para, xuntos, «dar forza á tradición viva da música, a palabra e o baile galegos». Cabana co Monte Branco, Camariñas co Vilán, aquí estamos os mellores na arte de regueifar // Aquí xa chegou Carballo, ao insti de Camariñas; o mundo vai conquistare a Costa da Morte unida!. Con coplas coma estas entraron os rapaces no Pedra da Aguia para tomar parte dun encontro que conduciu a regueifeira coristanquesa Lupe Blanco e que valoran como «todo un éxito», pola participación dos presentes e polo seu entusiasmo na versificación, no baile, no canto e na pandeireta. Unha sintonía «campal». Houbo xogos de improvisación e desafío, e houbo baile, con alumnado e profesorado acompasados na peza Muiñeira de Sofán.

Tal foi o bo facer do alumnado que, estando previsto elixir tres finalistas de cada centro nos xogos de desafío, finalmente foron entre seis e sete os escollidos por cada IES: ademais do Pedra da Aguia, o Eduardo Pondal (Ponteceso), o Parga Pondal (Carballo), o Alfredo Brañas (Carballo) e As Revoltas (Cabana). Todos eses nomes tomarán parte na xornada de volta desta Liga e este Encontro, que por vez primeira conflúen, unha velada que será alá para maio e na que tamén estará o IES Urbano Lugrís de Malpica.

«Foi un día intenso e cheo de enerxía», traslada a docente Carme Fernández dende A Ponte do Porto, algo nutrido tamén pola regueifa —pan de ovo— coa que colaborou PanIgnacio. Tamén o fixeron os Concellos de Vimianzo e Camariñas, apoiando unha iniciativa «que dinamiza a lingua galega e alenta as novas xeracións inzadas de bailadores e regueifeiros nacentes».

---

---

---