Hai uns días, a Fundación Eduardo Pondal utilizaba este lema para presentar unha Xornada de Emprendedurismo Xuvenil na que un grupo de mozos e mozas expoñían a súa experiencia como promotores e executores de distintos proxectos empresariais que están a alcanzar o éxito nas súas respectivas áreas. Hoxe, retomamos esta construción lingüística para falar dunha marea de mozos que guían a nosa actividade.
Moito se ten dito sobre a mocidade, sobre a necesidade dun futuro para ela, sobre se se trata dunha xeración «ni-ni», pero... ¿Que pasa coa xente moza que realmente está implicada no seu territorio, que culturalmente está motivada e ilusionada por facer perdurar as tradicións e a lingua dun pobo, con aqueles que queren traballar no rural e que queren construír o seu proxecto vital neste contorno? Este é o sentir xeneralizado do grupo de 30 mozos e mozas que estes días participarán en Ribeira no Congreso Internacional de Xuventude que se desenvolverá baixo o lema Da educación non formal ao emprego e ao emprendemento.
A xuventude do Couto ten moito que compartir neste encontro porque son moitas as iniciativas que ten desenvolvido ao longo destes anos nestes campos: educación non formal, emprego e emprendemento. A última, a xornada promovida pola Fundación Eduardo Pondal que contou con mozos como Alejandro Lamas, de Sixtema, ou Xosé Antonio Touriñán e Marcos Pereiro, á fronte de Airapro, entre outros moitos.
A fundación presentará en Ribeira un lote de catro actividades: voluntariado xuvenil, festival Con V de Valarés, Asociación Cultural Inllar e todas elas coa intención de que sirvan de estímulo e exemplo para outras entidades xuvenís interesadas en poñer en valor a contribución da mocidade á sociedade actual.
Neste marco, a entidade pontecesá tamén presentará o seu proxecto de Bolsas de Formación Non Formal Eduardo Pondal, dirixidas a mozas e mozos que, durante o seu período de estudos, queiran compaxinalo coa formación en bibliotecas, centros museísticos, entidades deportivas... Trátase dun intento de premiar desde a fundación toda esta dedicación e interese da xente nova por formarse e contribuír desde todos os ámbitos á mellora do benestar.
A mocidade do Couto e arredores rompe o mito de que a xuventude non está comprometida coa sociedade: aquí, non só se traballa por e para a sociedade, senón que somos quen de exportar o noso modelo de actuación, polo que agradecemos a oportunidade que nos brinda este Congreso Internacional de Xuventude. Non en tanto, todo este esforzo non pode quedar aquí, é preciso canalizar toda esta creatividade, toda esta experiencia e facer que evolucione e reverta en oportunidades laborais e de desenvolvemento para os mozos pero tamén para a área de influencia da súa acción. Hai que subir un chanzo máis: a mocidade empuxa e faino desde a construción dun modelo de sociedade na que as oportunidades, a experiencia e o saber e querer facer son máis que puras declaracións de intencións.
Son as razóns que esconden a verdadeira chave do futuro e do progreso de Galicia.