«Perdín o medo a expoñer animado por Caleidoscopio»

O sonense amosa por vez primeira en Barbanza a súa obra


ribeira / la voz

Xunto con outros integrantes do colectivo Caleidoscopio, o sonense Óscar Bonigno Santa Cruz amosa varias esculturas nas instalacións do Liceo de Noia. A exposición preséntase baixo o título Corpos en paralelo, e permanecerá no edificio noiés ata fin de mes. Esta é a primeira vez que o artista do Son dá a coñecer a súa obra en Barbanza, pero non será a derradeira.

-¿Cando comezou a súa afección pola escultura?

-Pois ven de antigo, pois empecei a miña formación na Coruña a finais da década dos setenta. Logo completei estudos no Mestre Mateo compostelán, onde realicei diferentes cursos de especialización.

-Con esa ampla formación, ¿non conseguiu abrirse camiño na escultura a nivel laboral?

-Pois non, é moi complicado. A verdade é que tampouco estiven nunca interesado en promocionarme no mercado artístico, nin sequera quixen expoñer os meus traballos. Ata que entrei a formar parte do colectivo Caleidoscopio nunca amosara as miñas creacións.

-¿Cando e por que nace este grupo?

-O colectivo está formado por persoas que coincidimos en cursos no Mestre Mateo. Decidimos crear un grupo que non é só de escultores, tamén teñen cabida a pintura ou a performance.

-¿Que obxectivos persegue Caleidoscopio?

-A idea é dar a coñecer as nosas obras, intercambiar experiencias e procurar locais para expoñer. O grupo iniciou a súa andaina no 2010 e, desde entón, expuxemos en Carballo, en Lalín e agora en Noia

-¿Que pode atopar o público no Liceo?

-É unha exposición de carácter figurativo, que xira ao redor do corpo humano. Cada un representa esta temática ao seu xeito.

-¿Xa hai seguinte parada para esta mostra?

-Pois si. A responsable de Cultura de Porto do Son fíxonos un ofrecemento e, cando remate outubro, desmontaremos no Liceo de Noia para trasladar alí a exposición.

-¿Cales son as súas preferencias á hora de crear?

-A escultura figurativa, desde tallas en madeira ata forxa, pasando por pedra, modelado, cerámica... Tamén toco técnicas experimentais, empregando incluso materiais de refugallo. Podo buscar a inspiración en algunha cousa ou facer sinxelamente unha amalgama.

-¿Por que se decidiu a amosar agora a súa obra?

-Quizais perdín o medo a expoñer animado por Caleidoscopio. Atopei a canle ideal para dar a coñecer a miña obra.

-¿Pensa incluso en chegar a vivir da arte?

-Si, agora si que mo planteo. Poder vivir do que a un lle gusta sempre é apetecible. De feito, as obras que se expoñen en Noia están á venta.

-Pero, ¿quizais non sexa o momento máis oportuno?

-Dámonos conta de que a situación non é doada, pero o único xeito de darnos a coñecer é sacar as obras a rúa.

óscar bonigno santa cruz escultor

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

«Perdín o medo a expoñer animado por Caleidoscopio»