Poñer a punto os pasos é esencial antes da procesión
23 mar 2016 . Actualizado a las 05:00 h.Manuel Rey (Viveiro, 1960) é secretario da Cofradía da Misericordia de Viveiro pero de vez en cando tamén fai tarefas de bricolaxe, as que tocan para que ninguén se leve un susto cun paso e para que a procesión funcione á perfección.
-¿Gústalle a Semana Santa?
-Si, sempre tivo para min algo de misterio, dende neno. A miña familia é de Galdo e alí tamén había moita tradición.
-No seu caso, deu un paso máis.
-Ser cofrade, si, supón un paso máis, igual que se formas parte dunha xunta directiva.
-¿Como leva a parte de montaxe e demáis?
-Son un pouco o que levo esa faceta, sempre coa colaboración dos compañeiros e dos cofrades. Unha persoa soa non da feito.
-¿Hai disponibilidade na xente?
-Si. De feito, temos un grupo formado por WhatsApp e se pedimos que a tal hora fai falla un determinado número de persoas para facer algo, case sempre sobran.
-¿Que tipo de traballos adoita facer?
-Por exemplo, reparar un candelabro, preparar as ánforas para poñer as flores, axustar as barras dos pasos, etcétera.
-A seguridade será algo a ter en conta.
-Claro, a protección persoal é o primeiro e despois a protección da imaxe. Como levador fas esforzos, pero o importante é que ninguén se lastime.
-¿Algún susto que lembre?
-Non, ao mellor nalgún ensaio, pero de lastimarse non lembro.
-¿Hai xente manitas dentro da confraría?
-Hai xente que é moi manitas, que tén idea. Así, un aporta unha cousa, outro outra, e escollemos a que menos traballo dea.
-Antes de saír o paso, ¿chequéase?
-Revísase sempre todo, dende os herraxes, as anclaxes... Aínda que o estado, en xeral, é perfecto. Está en moi bo estado. Algún ano facemos algunha modificación que se revisa cando sae.
-¿Que prefire?, ¿as tarefas ou os papeis?
-Máis as tarefas. Os compañeiros encargáronme a secretaría e a fago con gusto.