Presidenta de Fegatur (a Federación Galega de Turismo Rural) e propietaria do pazo A Nugalla, na Estrada (o concello galego con máis establecementos de turismo rural), Marisol Lorenzo non ten reparos en admitir que «como grupos empresariais, como microempresas que somos, non podemos esperar que a Administración nos vaia dar todo feito».
-¿Para os seus asociados foi mellor a Semana Santa do 2007 do que parece que vai ser esta?
-Estamos acusando un pouco este medo á crise que se di por aí. A xente, antes de reservar, di vai ver «qué vai pasar coa hipoteca», e anda un pouco máis retraída.
-¿Calquera tempo pasado foi mellor?
-O ano pasado as cousas estaban un pouco mellor, había máis reservas e mellor repartidas, e agora hai unha maior concentración en zonas que se promocionaron.
-¿E que fai a Xunta?
-En realidade, debemos recoñecer que a Xunta debe ser unha axuda e máis nada.
-¿Cal é a solución?
-Asociarnos todos, como xa facemos en Fegatur, para chegar a sitios aos que illadamente non daremos chegado, pero xuntos, con autopromoción, son alcanzables. E hai zonas que necesitan promoción conxunta con outras actividades, como a pesca ou a visita a espazos naturais.
-¿Non existen moitas casas de turismo rural?
-Demos o tope. Agora o que temos é que competir en calidade e en oferta. Non só en aloxamento e restauración, senón noutras actividades que fagan atractivo o turismo rural e que promocionen subsectores que ata agora non foron promocionados.
-¿Por exemplo?
-O turismo de natureza, poñer en valor a Rede Natura, o patrimonio organizando rutas de arqueoloxía...