Paco Lodeiro pregunta, Galicia responde

YES

O CONCURSO DE MODA... De sábado a mércores, de 22 a 22.30 horas, o espazo de preguntas e respostas da TVG, «Atrápame se podes», é o programa máis visto en Galicia. Así é unha xornada de gravación

25 sep 2021 . Actualizado a las 23:41 h.

Todo comeza cun test de antíxenos. Aos concursantes e ao presentador. Iso é o único, no Atrápame se podes, que lembra que aínda estamos saíndo dunha pandemia. Unha vez os resultados son negativos comeza no plató unha festa que se compón de catro ingredientes básicos: sentido do humor, preguntas cargadas de idiosincrasia galega, clásicos musicais cheos de nostalxia e moitos aplausos. No programa revelación da Galega os concursantes responden preto dun cento de preguntas cada día. Sen máscaras e con ganas de levar un bote que cada semana medra mil euros. Que hai que facer para atrapalo? «Abonda con ter un chisco de sorte, porque o propio formato fomenta que non haxa que ser Einstein para gañar», apunta Jacobo Paz, un dos guionistas. E non lle falta razón. Das catro fases, a primeira é a menos competitiva, cunha sucesión rápida de preguntas a cada un dos cinco concursantes. Cada acerto suma puntos á «saca común», como lle chama Paco Lodeiro, mestre desta cerimonia do audiovisual. Antes de chegar aos cartos, os cinco concursantes retaranse entre eles e o que menos puntos teña quedará eliminado. Aos catro restantes só lles queda medirse por parellas antes de ter a opción de subir as escaleiras que levan ao bote. Lodeiro, como xa saben os fieis ao programa, resume esta parte dicindo «os que agora son amigos pasarán a ser rivais na final». E así é, o conto cambia no derradeiro acto: a iluminación abandona o tono festivo e adquire un vermello dramático. Non é para menos. De acertar as cinco últimas preguntas subiranse os cinco chanzos dunha escaleira chea de diñeiro. Agora mesmo son catro mil euros, pero o pasado 2 de setembro Ramiro Vidal, desempregado de Oleiros, meteu no peto 12.200. Iso sí, dos cinco días que concursou, perdeu unha das dúas finais que disputou. «Preguntáronme polo cantante de Guns N’ Roses e eu, todo acelerado, dixen Slash sabendo que era Axl Rose. Arrepentireime toda a vida pola vergoña do vacile que me caerá», dicía nunha entrevista en La Voz. Ao día seguinte, saber que American Idiot era un disco de Green Day permitiulle resarcirse.

Enxeño e humor

Emre Mor ou Conde Mor. Cal deles xoga no Celta? Preguntar a quen se lle atribúe a frase «tanto monta, monta tanto» e que a parella que se xogaba o pase á final respondera «Ikea» no canto dos «Reis Católicos», que era a correcta. Ou mesmo facer dubidar entre Rouco Varela e Rocco Siffredi para saber cal deles foi arzebispo de Santiago son tres mostras da carga irónica que teñen algunhas cuestións. Unha das claves que fai diferente ao Atrápame do resto dos concursos, un dos xéneros máis cultivados nas grellas televisivas. «Despois de todo un verán de concurso os espectadores xa saben que o Miño nace no Pedregal de Irimia ou que Antonio Rosón foi o primeiro presidente da Xunta preautonómica, pero ademais desas, cada pregunta é un reto creativo para nós e procuramos facelas con chiste e con analoxías divertidas», apunta Nerea Angueira, redactora.

«Unha das cousas que podo dicir é que eu son o que máis me divirto no Atrápame se podes... Admiro a capacidade que ten o equipo do programa de facer unha pregunta tras outra nunha tarefa máis propia dunha fiandeira que de guionista», sinala o presentador mentres bota unha ollada á súa tablet, onde está, ben gardado, o interrogatorio que esta mesma noite (e ata o vindeiro mércores) terán Jairo Pazos, Xoaquín Cambados, Lalo Sánchez, Fátima Nouche e Andrea Rodríguez. Esta última, guía nun museo na localidade coruñesa de Camelle, está encantada de poder vivir dende dentro unha experiencia que xa gozaba dende a casa: «O certo é que no sofá é moi fácil participar porque na tele vas vendo as opcións de resposta e Paco Lodeiro sempre que pode dálle o seu toque e é moi divertido». E cal é entón ese «toque Lodeiro»? «Tendo en conta que canta e imita, trátase de aproveitar as cualidades do noso showman, que acolleu o proxecto coa mesma ilusión que un aspirante a levar o bote», apunta o realizador do espazo, Jorge García. Porque Lodeiro fai diferente e propio un formato que noutras canles autonómicas presentan «clásicos» da televisión coma Patxi Alonso (ETB), Llum Barrera (IB3) ou Manuel Sarriá (Canal Sur). Se un concursante ten que completar unha canción de Julio Iglesias aporta a entonación que vén ao caso. E facer de Paco Vázquez, Manuel Fraga ou Papuchi é algo que aporta unha dose vitaminada a cada reto que aparece en pantalla. «Se a iso unimos que en cada programa sempre se descobre un recuncho de Galicia ou unha obra musical ou literaria do noso país tes a explicación de porque estou aquí», di o grovense Xoaquín detrás do seu atril de concursante.

Concurso de «talentos»

«Despois de cinco días xuntos dá pena que remate porque acabas colléndolle cariño aos teus rivais e mesmo queres que algún deles gañe», di o verinense Lalo antes de comezar o penúltimo dos seus programas. Mentres Jairo, chegado dende Palas de Rei e portando unha guitarra, promételle a Lodeiro unha canción: «farémola este martes, estean atentos na casa, porque aquí poñémonos ao dispor das galegas e galegos para que amosen as súas capacidades». O talento no Atrápame, chegado dende toda Galicia, non só consiste en responder preguntas. Báilase, cántase, tócanse instrumentos e mesmo houbo quen en vez de subir as escaleiras caeu delas antes de comezar o programa porque era especialista de cine. Unha boa maneira de deixar na casa os nervios, xa que cada noite máis de cen mil persoas converten a este concurso no programa máis visto na súa franxa de emisión. «É como ter ao Camp Nou pendente de ti, pero o bo é que ningún destes fichou aínda polo PSG, aproveitade a ocasión», aconsella Paco Lodeiro á hora de facer a escolla no mando a distancia.

MARTA LODEIRO, rexedora

É a encargada de que presentador e concursantes saiban en todo momento o que teñen que facer en plató. E non, non é familiar de Paco.

Ana Fontán, directora de cásting

Xestiona os contactos que cada semana amosan a súa intención de concursar. Realiza entrevistas e tests de preguntas para que a dirección do programa coñeza polo miúdo os perfís das galegas e galegos que queren vir a plató.

Chus Fernández, xefa de producción

Administra o equipo técnico e organiza a intendencia. Que se cumpran os horarios e que todo estea listo cando é preciso é o seu forte.

Ramiro Vidal: «Acabei tan cansado que non dixen que gañara o bote ata o día seguinte»

b. p. l.

Ramiro Vidal (Santa Cruz, Oleiros, 1973) converteuse onte á noite no primeiro gañador do bote do concurso Atrápame se podes, que Televisión de Galicia emite de domingo a xoves e que está presentado por Paco Lodeiro. Actualmente en paro, Vidal traballou como froiteiro, como docente na Cruz Vermella e ten unha larga experiencia no ámbito da figuración en series como Serramoura, Viradeira, Urxencia Cero, Matalobos e Padre Casares. En Atrápame se podes chegou tres veces á final e á terceira foi a vencida. O premio de 12.000 euros, acumulado desde a estrea do programa en xuño, xa é seu.

Seguir leyendo