A vida de María Solinha estréase na gran pantalla de Redondela e Cangas

CANGAS

C

Tras estes primeiros pases, a película de Ignacio Vilar sobre a viúva acusada de meiga e símbolo da loita contra a represión das mulleres, percorrerá outros cen concellos

12 jun 2020 . Actualizado a las 20:11 h.

A esperada película de Ignacio Vilar María Solinha, percorrerá máis dun cento de concellos galegos entre os meses de xuño e outubro deste ano e transgredirá as fronteiras autonómicas con representacións en Castela e León e Portugal. Así se puxo de manifesto na presentación que tivo lugar este venres no Auditorio de Cangas, vila que, xunto a Redondela, acollerá a estrea da longametraxe sobre a viúva acusada de meiga e símbolo da loita contra a represión das mulleres.

«Esta historia emociónanos a todas porque é a nosa historia, é a historia das mulleres» manifestou a presidenta da Deputación, Carmela Silva, que asistiu á presentación, na que tamén estiveron o alcalde de Cangas, Xosé Manuel Pazos e a alcaldesa de Redondela, Digna Rivas, e o director de AGADIC, Jacobo Sutil, amais de todo o elenco da película co director, Ignacio Vilar, o responsable da exhibición, Xoán Mariño, e as actrices e actores Laura Míguez, Grial Montes, Antonio Durán Morris, Santi Prego e Mabel Rivera.

A primeira proxección do filme será o vindeiro venres 19 de xuño no concello de Redondela, mentres que o 20 de xuño María Solinha chegará a Cangas. Ambas estreas serán ó aire libre. «A presentación vai percorrer o territorio levando o cinema e a cultura a todos os lugares. Imos levar o cinema a toda a xente. Hai algo máis democrático?» preguntou a presidenta da Deputación sobre o modelo de distribución que se escolleu. Segundo Xoán Mariño, o xeito no que se moverá a película representa «un feito histórico porque non hai moitas pelis que estreen primeiro no rural e logo nos cines. Ademais, debe ser a primeira vez que se estree unha película nun autocine». Deste xeito, entre os meses de xuño e outubro deste ano haberá estreas en numerosos concellos de toda Galicia. En todos os casos se seguirán as recomendacións e directrices derivadas da situación de crise sanitaria provocada polo COVID-19, polo que a longametraxe será proxectada nas mellores condicións técnicas para garantir todas as medidas de seguridade, aforo e hixienización.