CAMILO FRIOL MI CALLE
19 sep 2001 . Actualizado a las 07:00 h.Todo o mundo se empeña en irse de vacacións a Canarias ou ó Caribe. Ben, agora o de voar non ten moitos adeptos, pero esa segue a se-la tendencia. Pois se eu puidese marchar de vacacións, iríame ó calexón de Dereito. Si, ese lugar da cidade no que sería posible dormir sen ningún ruído durante os tres meses do verán. Mais para vivir non o escollería. Porque é coma un río que seca no verán, pero que no inverno canaliza toda a tromba de estudiantes. E seguindo co paralelismo fluvial («o Sil leva a auga e o Miño a fama»), ¿por que se lle chama o calexón de Dereito se por alí pasan de moitas outras carreiras? Por exemplo, os que están facendo Tempo Libre e atallan para ir xogar ó mus á cafetería do antigo SEU. Como é lugar de paso non falta quen reparta cuartillas informativas que acaban estradas no chan uns metros máis adiante. Non me estrañaría nada ver alí este mes políticos repartindo papeletas electorais, porque os votantes, coma os apuntes, fabrícanse en Copy Campus. redac.santiago@lavoz.com