«Na miña aldea en agosto cómese caldo!»

O actor e cantante Christian Escuredo aproveita un descanso entre gravación e gravación para relaxarse en Ourense


O seu rostro sóanos de velo na tele, en Pazo de familia, e tamén porque foi o xogador do Cambados que se atreveu a roubarlle a parella a Sito Miñanco en Fariña. Pero Christian Escuredo (O Barco de Valdeorras, 1984) tamén colleita fama e premios, coma o de mellor actor protagonista Broadway World, polo seu papel da drag Felicia na adaptación como musical de Priscilla, reina del desierto. A súa voz -figura na nómina de Disney pola banda sonora de Phineas & Ferb- é unha parte imprescindible do encanto que destila o actor, harmónico e fresco como os Valdeorras da súa terra. Apurado entre rodaxes e xiras, pillámolo nuns días de descanso no seu retiro favorito: a aldea.

-Que tal son os veráns sen praia?

-Pois moi bos. De neno pasaba case todas as vacacións na aldea, no embalse de Prada e uns días nas Rías Baixas. O máis importante é a compañía, ou calquera espazo no que te sintas ben e conectado contigo mesmo.

-Para tomar algo nunha terraza, a cita é na túa casa... Es directo?

-É que gozo moito na miña casa da aldea [rompe a rir]. Restaureina hai uns anos e compartila cos meus amigos faime moi feliz.

-Esta é a mellor estación?

-Penso que si, de tódolos xeitos sácolle moito partido ao frío. Encántame o momento manta, sofá e lume.

-Algún proxecto novo na mesa?

-Estase cociñando un proxecto do que moi pronto vos falarei!

-Ten tan mala fama Galicia por fóra por culpa do tempo?

-Algo ten, pero os que veñen colgan moitos selfis na praia. Digo eu que mal non se está!

-Usas moito Instagram. Gusta o postureo?

-Compartir é vivir! A verdade é que teño seguidores e seguidoras moi fieis e moi divertidos.

-Polo menos nas redes, vendes moito a terra. Algo que nos recomendes para unha escapada?

-Adoro Galicia, encántame descubrir novos recunchos e volver aos que me fliparon. Gozar da montaña ten tanto ou máis encanto ca facelo dunha praia. De verdade. E non falto aos festivais de teatro, o de Mérida, o de Almagro, ou a MIT de Ribadavia. Para refrescarme vou ao embalse de Prada, na Veiga.

-E viaxar, que tal o levas?

-Son un gran inversor en viaxes, é un dos meus vicios, e gasto os cartos con moito gusto. Recomendo ir a calquera sitio que estea no runrún da túa cabeza. Na miña estaba EE. UU., Tailandia, Indonesia, Islandia, Arxentina, moitas cidades europeas... Acabo de vir de Israel e non tardarei en visitar Tanzania. Coñecer novas culturas, lugares, xentes, músicas... fainos sentir vivos, abre as conciencias, e penso que nos fai mellores persoas.

-Tes algo en común cos teus personaxes nas series?

-Só no de beber cervexas, albariños e facer escapadas ás Rías Baixas.

-Pódense facer amigos no mundo da actuación?

-Por suposto que si! De feito, os meus mellores amigos coñecinos traballando. Foi inevitable namorarme de Jana Pérez, é que ela é marabillosa. Non hai día no que non soe algún dos grupos de WhatsApp que teño cos meus compañeiros.

-Actúas, pero tamén cantas. Ata te desenvolves facendo as dúas cousas á vez, como no musical «Priscilla». Non paras!

-Hai rachas... O de cantante vai no paquete de actor. Non me podo queixar. E que non pare!

-Como cantante, hai que preguntalo... Es fan ou detestas as cancións de verán?

-Depende da canción, aínda que podo acabar saturado de tanto que as repiten.

-Algunha que te poña dos nervios?

-Opá, yo viaze un corrá...

-El Koala! Xa choveu diso. E, ao contrario... Algunha á que non poidas resistirte?

-Eu son máis de Dorian ou Vetusta. Todo depende do momento.

-Algo que nunca fagas nesta época. Ir ao cine, por exemplo?

-Si que vou! Fun ver Ocean’s 8. E na aldea, en agosto cómese caldo, e pola noite lévase manga longa [risas]. No verán todo é posible, ata namorarse!

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

«Na miña aldea en agosto cómese caldo!»