Esta moza, que xa encabezou a lista nas xerais, aspira a coller o relevo de Tereixa Paz no Parlamento galego
21 sep 2016 . Actualizado a las 05:00 h.Foi cabeza da cartel do Bloque Nacionalista Galeg nas xerais de decembro e repetiu na cita de xuño ao Congreso. Noa Presas (Ourense, 1987) empeza a ser un rostro máis coñecido para os cidadáns da provincia. As enquisas apuntan a que podería entrar no Parlamento galego.
-Vostede é moi moza e a pesar de todo semella que leva toda a vida na política...
-Se entendemos a política como un compromiso que pasa por diferentes campos de batalla, levo tempo. Dende o instituto.
-¿E que che empurrou?
-Empecei a raíz de Nunca Máis. Cando o Prestige tiña 15 anos. Foi unha época convulsa; non so polo naufraxio senón tamén pola guerra.
-¿De onde ven a súa atracción polo nacionalismo?
-Daquela, e como me foi pasando ao longo da miña vida, o nacionalismo era o movemento que defendía e daba resposta as necesidades do momento. Eu son neofalante, ate entón a miña lingua habitual era o castelán; non tanto na casa senón fóra.
-¿Por que está o BNG a perder tanto apoio social dende hai xa moito tempo?
-Hai moitas causas. A nós tócanos pensar sobre as propias, sobre os elementos externos non podemos incidir. Temos que pensar que é o que non fixemos ben nas institucións e no contacto coa base social.
-¿Que explicación ten que o BNG esté botando man de xente tan nova? ¿Faltan titulares e saen os do banco?
-Para nada é así. Durante moito tempos se nos achacou que non estabamos renovando. Fai un tempo, cos debates abertos, pedíronsenos cambios e é o que estamos facendo agora. Que algunhas persoas dean un paso atrás na esfera pública e outras asumamos responsabilidades é o natural.
-¿Non hai cadros políticos que podían estar en primeira liña e optaron por marchar?
-Os cadros políticos se crean e se forman no traballo diario da organización. E tamén é necesario lanzalos a un plano máis público.
-¿Cales son os problemas que máis lle preocupan de Galicia?
-Todos están vencellados á necesidade de cambios estruturais, de cambios profundos. E , sobre todo, de recuperar peso político para decidir sobre os nosos procesos produtivos e poder así rematar co desemprego.
-Vostede é moza traballadora e ven de sufrir a precariedade laboral. ¿Tivo algún tipo de repercusión laboral a súa militancia política?
-Non as sufrín de forma directa, pero nun sitio como Ourense posicionarse politicamente e facelo dentro do Bloque ten consecuencias laborais. Falo das expectativas.
-¿Está sinalando a Baltar?
-Aquí a rede clientelar do PP é moito máis profunda que noutros sitios. Isto complica sacar a cabeza. Nós vivímolo nos concellos cando intentamos facer candidaturas e non o conseguimos por presións directas sobre as persoas. O PP a nivel galego interésalle este panorama en Ourense.
-¿A que se refire?
-Feijoo non gañaría se non tivera o clientelismo de Baltar á súa disposición electoral. Iso téñoo claro.
-¿Que propón para Ourense, a provincia pola que se presenta?
-Estamos máis preto de ser un deserto que de ser unha realidade viva. E para mudar iso fan falta cambios profundos, sobre todo no medio rural, que precisa un mellor aproveitamento do monte. O que é inadmisible e que na provincia máis envellecida e con máis cota de emigración xuvenil a proposta estrela do PP sexa un parque acuático.
«Feijoo non gañaría se non tivera o clientelismo de Baltar á súa disposición»
«Hai que recuperar peso político para decidir sobre os nosos procesos produtivos»