«A problemática ambiental en Ourense é multiple e complexa»

A bióloga Alejandra Couto Vázquez é dende maio responsable da sociedade galega de historia natural na provincia


ourense / la voz

O GOG-SGHN (Sociedade Galega de Historia Natural), creado en 1973, é unha das organizacións de defensa ambiental máis antigas de España e en Ourense, a delegación creouse en 1980. Alejandra Couto Vázquez (1979, Santiago) é doutora en Bioloxía pola Universidade de Santiago de Compostela e secretaria da delegación en Ourense da SGHN dende maio de 2012, aínda que colabora coma voluntaria dende o 2007.

-¿Cales son os principais obxectivos do SGHN?

-O estudo, divulgación, conservación e defensa do medio natural. Nos últimos anos incrementouse ademais notablemente o traballo de participación nos procesos de avaliación de impacto ambiental de proxectos moi variados.

-¿Como califica a situación ambiental en Ourense?

-Ourense posúe, aínda, un altísimo potencial de desenvolvemento baseado na conservación e valoración da súa biodiversidade e paisaxe. Lamentablemente, e en xeral, a conservación destes espazos queda no papel e o seu estado empeora día a día. Hai moito por facer, incluíndo que todos recoñezamos e saibamos valorar o noso patrimonio natural, estea ou non legalmente protexido.

-¿Cales son os principais problemas na provincia?

-En Ourense a problemática ambiental é múltiple e complexa; nunca son casos exclusivamente ambientais senón que se relacionan íntimamente con calquera outro problema da vida, tecendo unha rede que, se non somos quen de rachar, hanos levar á deriva. Destacariamos a problemática dos incendiarios forestais. Non podemos esquecer tampouco a presión sobre os espacios naturais das infraestruturas, a minería, as industrias enerxéticas, os residuos, os cazadores, o tránsito de vehículos sen control, etcétera. Hai que destacar o progresivo e galopante empeoramento das augas, o declive de especies autóctonas acompañado do incremento das especies invasoras, ou mesmo a pasividade das administracións ante feitos realmente graves e con serias repercusións sobre o noso entorno.

-¿Existe conciencia ambiental?

-En canto á cidadanía pensamos que si hai coñecemento de que a natureza está a ser agredida. É máis, calquera a quen lle preguntes pode falar de ríos ou encoros nos que antes se bañaba ou pescaba e hoxe están sen auga ou contaminados, de fontes nas que xa non pode bebe, etcétera. No caso dos políticos ourensáns cremos que as súas actitudes e comportamentos deberan ser exemplarizantes para a cidadanía, deberan ir un paso por diante do resto da sociedade pero, desgraciadamente, moitas veces van un, ou varios, pasos por detrás.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

«A problemática ambiental en Ourense é multiple e complexa»