Iván Salgado atopa escasos cambios na súa cidade natal. «A única sorpresa que levei nos últimos anos foi que La Ibense non estaba no seu lugar de sempre», di o xogador ourensán. Está matriculado na UNED, en Psicoloxía, e entre as súas afeccións destaca a lectura. «Leo de todo, pero o que máis, psicoloxía deportiva e biografías de deportistas. A novela non me interesa tanto, pero leo entre vinte e trinta libros ao ano».
O xadrecista ourensán viaxou no pasado 2011 por Europa, India e Estados Unidos e coida que iso influiu negativamente nos seus resultados. Salgado afirma que «as viaxes gústanme cada vez menos». Para adestrar e xogar prefire o contacto persoal antes que facelo por Internet, aínda que usa os ordenadores para acumular información. Está nun momento clave da súa carreira e admite que nestes anos necesitará «toda a axuda posible para chegar aí arriba» e acceder aos mellores torneos.