Comprende Donald Trump a abstracción do «espectro radioeléctrico»? Quizais dea distinguido entre radiocomunicación e radiolocalización. Porén, eses conceptos hoxe deciden batallas, concretamente nas incursións en terreo inimigo. Trump mandou deter a Maduro e conseguiuse de xeito rápido e cun mínimo de violencia bélica tradicional, enfocando a operación nos centros de vixilancia do espazo aéreo venezolano. Nestes analízase o que ocorre no espectro radioeléctrico: frecuencias, amplitudes, fases, «sinaturas»... dos sinais que se observan. Por tales características das ondas que emite cada intruso cómpre deducir a súa identidade, onde está e que rumbo leva.
A guerra electrónica é vella, foise refinando. Gaña nela quen é capaz de moverse a vontade mentres engana os dispositivos de vixilancia do inimigo. Quen facilitou o triunfo ao Trump desta volta? O apoio de caza-bombardeiros modificados, alixeirados de canóns e foguetes para transportaren «perturbadores de espectro». Cacharon nas patacas os venezolanos e os seus asesores rusos: toleáronlles os sistemas de resposta que ben podían atinxir helicópteros. Nun escenario de maiores proporcións, coma o da Groenlandia, a telemática militar ianqui aínda podería tentar a confusión total do inimigo (a UE?) desde o espazo. Ogallá non o vexamos