Os desafíos da lingua

Víctor F. Freixanes
víctor f. freixanes VENTO NAS VELAS

OPINIÓN

Xoan Carlos Gil

29 may 2022 . Actualizado a las 05:00 h.

Hai poucos días, a Xunta de Galicia e a Universidade de Santiago presentaron o proxecto Nós de intelixencia artificial, un ambicioso (e necesario) plan de traballo para incorporar a lingua galega ás novas tecnoloxías da comunicación, moi principalmente ao que comunmente denominamos a linguaxe das máquinas. 

Lembrade ese vídeo que se fixo viral hai pouco no que aparece unha nena de tres anos intentando dialogar en galego inutilmente cun dispositivo dixital que non a entende. «Ti non sabes», dille a rapaciña, arredándoo de si. O mundo vive momentos de alta aceleración e a lingua galega non queda á marxe.

Teño diante de min o último número da revista Grial (233), que vén de saír cun monográfico dedicado aos desafíos do galego no tempo presente. Non é a primeira vez que falamos disto. De feito, cando tiven a honra de ser recibido como académico numerario na Real Academia Galega (RAG), o meu discurso versou sobre estas cuestións, acolléndome a esa afirmación tan repetida do sociólogo Neil Postmann, segundo a cal, as culturas (e as linguas) enfróntanse periodicamente a encrucilladas que, en certa maneira, as poñen a proba. Aquelas que non superaron a escrita ficaron fóra da historia, a tecnoloxía do libro (Gutenberg) peneirou unha chea delas, logo viñeron os medios de comunicación de masas, a revolución do cinema, a radio e a televisión… Agora, internet e as redes sociais.