Cunqueiro e o Grial


Eu creo, como cría Álvaro Cunqueiro, que o Santo Grial está no noso Cebreiro, na igrexa prerrománica de Santa María (século IX), que custodia un cáliz románico. O autor de Merlín e familia estaba tan convencido disto que adoitaba ir por alí e, co permiso do párroco, poñía a ópera Parsifal de Wagner a todo volume. Daquela, seica comezaban a moverse arredor do escritor as personaxes da obra. Isto é, Parsifal co Santo Grial nunha man e a lanza que atravesou o costado de Cristo na outra, a escrava Kundry, o malvado feiticeiro Klingsor e o grande Amfortas, gardián do cáliz sagrado.

Con esta obra, escrita para consagrar e agrandar o seu Festival de Bayreuth, Wagner rehabilitou e modernizou o poema épico medieval homónimo de Wolfram von Eschenbach. O resultado final é unha ópera de contido medieval que pon en pé os grandes temas dunha relixiosidade emparentada coa maxia e coa meiguería, pero tamén co amor, a compaixón e a xustiza. Algo que Cunqueiro descifraba con emoción e talento sutil. Porque o escritor de Mondoñedo era un enorme fabulador de feitizos, encantamentos, prodixios, conxuros e embruxos, con astroloxías varias e dispersas.

Cunqueiro sempre estivo moi atraído pola memoria dos romances artúricos que corrían de boca en boca e de xeración en xeración, século tras século, pola nosa terra. Algo sobre o que xa chamara a atención o poeta Ramón Cabanillas coas sagas artúricas que asoman no seu fermoso libro Na noite estrelecida, de inesquecible fondura poética.

Cunqueiro prendeu fondo na tradición artúrica, como é ben sabido. Xa de mozo imaxinaba a don Galaz -ou Galahad- subindo a cabalo cara ao Cebreiro, para prostrarse de xeonllos ante o cáliz que tivo de certo o sangue de Cristo. Non era posible que don Álvaro puidese evitar poñer a súa imaxinación ao servizo de todo aquilo, entre outras cousas porque esa fantasía era infinitamente superior á súa realidade cotiá. Chrétien de Troyes morreu sen acabar o seu relato. Robert de Boron tampouco puido rematar a súa versión. Nin sequera Cunqueiro, moitos séculos despois, conseguiu desvelar o misterio. Pero si que puido escoitar e soñar o Parsifal na igrexa do Cebreiro. Algo sublime e grande.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
15 votos
Comentarios

Cunqueiro e o Grial