As palabras de Juncker poderían abrir un capítulo interesante nisto da independencia catalá, se Puigdemont e compañía non fosen tan insensatos como para tomarllo de broma: Se Cataluña fose independente, «quedaría automaticamente fóra da Unión Europea e o seu reingreso podería ser vetado por España ou calquera outro Estado membro».
O Goberno independentista podería aproveitar a ocasión para dicirlle ao pobo catalán os sufrimentos que terán que soportar se algunha vez chegan a conseguir a independencia, lexítima aspiración de calquera pobo que se senta oprimido ou colonizado por outro, que parece ser o caso de Cataluña.
Poderían falar da imposibilidade de ser admitidos nas Nacións Unidas, e na Unión Europea, institucións remisas a admitir a independencia dunha provincia, mesmo tras un referendo legal, que non é o caso.
E tamén de que os cataláns deixarían de ter o pasaporte europeo, así que adeus ao paseo por unha Europa sen fronteiras. E o mesmo sucedería cos seus produtos, que deberían pagar aranceis, o que encarecería e faría máis difícil vendelos. E que a maioría da empresas e fábricas marcharíanse, buscando países máis tranquilos onde o seu diñeiro non corra riscos.
En fin, poderían aproveitar a ocasión para dicir o que nunca dixeron: «Non teño máis nada que ofrecer que sangue, esforzo, bágoas e suor»… Así se defende un pobo, e así se constrúe unha nación, pero diso, Puigdemont e compañía parece que non teñen nin idea.