s automóbiles e móbiles e os ruídos serán pisados polo silencio e as follas dos lirios que crecerán esta primavera. As computadoras deixarán de computar a túa vida. Terás máis horas para os amigos e menos para os adversarios. O odio ha de esfumarse por un meiguizo da fada Morgana, tan mala. Reinarán as cores e o branco e negro quedará para as películas que tanto nos gustan, pese a todo (Vivan Billy Wilder e King Vidor e Lubitsch e Chaplin e Renoir). Levantarás o corazón cada vez que o corazón caia en desuso. Amarás e serás amado. As nostalxias terán sabor a chocolate. A ansiedade e os nervios e os nerviosos desaparecerán dos dicionarios. Ser feliz custará menos que un billete ao inferno. Non durmirás sen ela, sen el. Serán ricos os pobres. A miseria, por miserable, arderá en todas as prazas do mundo. As cousas pequenas darán un golpe na mesa do FMI. As asignaturas serán menos. Volveremos ler poesía nas aulas e correrá pola pel dos adolescentes a caricia de Neruda: «Quítame el pan si quieres, quítame el aire, pero no me quites tu risa porque me moriría». Crecerán os ananos que queiran deixar de ser ananos. E faranse pequenos os que estean cansos da súa grandeza. A ilusión será menos ilusa e, de cando en vez, será real carne corpo terra. Sairán coelliños dos sombreiros. E os magos escribirán nas libretas dos políticos os renglóns do sentido común: solucionaranse os problemas. Correrás detrás do gozo e esta vez non será secuestrado, outra vez, pola tristeza. Non haberá máis enfermos que os enfermos de alegría. Non escoitarás adeus, nin nas telenovelas. Quero dicir que te despedirás para volver. E serás abrazada, abrazado, como a primeira vez. Soñemos, camarada.