A mobilidade na investigación


Dentro do mundo da ciencia a mobilidade e básica. Aprender doutras formas de facer as cousas e enfocar os problemas é sempre enriquecedor. A resposta aos problemas científicos esixe hoxe unha abordaxe multidisciplinaria e os contactos e saber quen te pode axudar para darlle unha resposta aos enigmas da vida, estea aquí, en Suecia ou Australia, vaise aprendendo a base de tempo e viaxes. Pero aínda é mais importante o que estes aportan na propia maneira de entender o mundo, os seus problemas, as cousas boas que cada cultura e pobo como cada individuo teñen, e as cousas que podemos mellorar.

Eu sempre aprendín e sigo aprendendo nos meus viaxes (que é rara a semana que non teño) e animo á xente que queira facer investigación a que faga o esforzo de moverse. Tamén é certo que hai lugares nos que me atopo máis a gusto que en outros, e aínda que tiven moitas ofertas de traballo fóra e moitas delas moi tentadoras (e para mín o científico foi sempre moito máis tentador que o económico), sempre quixen traballar en e para a miña terra e estar ao carón dos meus.

A Ciencia é un exercicio universal, que en todo o mundo pode ter espazos propios, que se nega a aceptar fronteiras. Mais, ao tempo, os científicos somos seres humanos, con querenzas; e os científicos galegos levamos connosco tanta carga de morriña e saudade como leva calquera outro emigrante.

E moitos de nós queremos facer Ciencia aquí. Cómpre poñer entre todos -científicos ou non- os recursos necesarios para que cantos nos formamos en Galicia, poidamos vivir onde nos pete e acaia, aínda que a Humanidade nos fique pequena de tanto viaxarmos e partillarmos coñecemento pola face da Terra.

Por Ángel Carracedo Investigador de la USC

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

A mobilidade na investigación