O Enterro da Sardiña de Lugo volve cheo de música e sátira: «Conseguimos que a xente maior saia á rúa, ese é o noso motor»
LUGO
A orquestra Terra Nova, dirixida por Nicolás Ravelli, acompañará a procesión do mércores 18. Antes, este domingo 8, a asociación Pepe Barreiro organiza un orixinal concerto no Círculo das Artes
04 feb 2026 . Actualizado a las 10:13 h.A sátira será, como cada ano, a protagonista do tradicional Enterro da Sardiña, que se celebrará o día 18, Mércores de Cinza, como peche dos actos de Entroido de Lugo. Pero, nesta ocasión, a música tamén cobrará un protagonismo especial, posto que a Xove Orquestra de Lugo Terra Nova, baixo a dirección de Nicolás Ravelli, acompañará á procesión durante todo o percorrido do Enterro. «Estamos moi satisfeitos e agradecidos porque non é fácil que unha orquestra de músicos de Conservatorio se presten a algo así, a adaptarse a nós e ás nosas partituras. Pero levamos tempo traballando xunto a Nicolás Ravelli, que é a alma de Terra Nova, e grazas a el foi posible», comenta Olga Díaz, presidenta da Asociación Cultural Pepe Barreiro, que organiza o Enterro da Sardiña.
Esta celebración terá lugar o mércores 18 ás 20.00 horas na Praza Maior de Lugo. A procesión partirá de diante do Círculo das Artes e percorrerá parte do centro histórico ata rematar diante do Concello, onde terá lugar o concurso de ferretes, que este ano agardan que aumente considerablemente o número de participantes.
O espectáculo, acompañado por Terra Nova, Estoupacaldeiros e o Orfeón Xoán Montes, contará cunha coidada posta en escena e unha serie de personaxes que cobran vida cada Entroido desde os anos oitenta: o Gran Espetón, que é a persoa encargada de ler os ferretes, tanto na Praza Maior como nas paradas da procesión; o Gran Escarpinante, portador da sardiña; o Someigo Maior, que é a autoridade principal, a modo de alcalde; dous Pidórnigos, similares a sancristáns que acompañan ao Espetón; dous Lagaricías, que levan os pendóns do Círculo e o Concello; o xuíz, para levantar o cadáver; as choronas; e a xente que leva as sardiñas, a caixa, o coro... Polo que a comitiva supera cada ano ao cento de persoas.
A participación está aberta a todos os cidadáns, sen necesidade de ser socio, informándose na asociación Pepe Barreiro. O próximo ensaio desta festa terá lugar o martes 10, ás 20.00 horas no Círculo das Artes.
Bases do concurso
En canto ao concurso de ferretes, o prazo aínda está aberto ata este venres, día 6. Trátase de breves coplas de sátira social que se recitarán diante do Concello ao rematar a procesión do Enterro. O contido sempre conta cunha boa carga crítica, sobre todo da actividade municipal, pero sempre dentro do respecto. Os ferretes deberán estar escritos en galego e o seu contido ten que facer referencia a acontecementos de actualidade local, preferentemente, aínda que tamén pode ser provincial ou galega. O retrouso, que se irá repetindo entre estrofa e estrofa, terá que ser unha estrofa de catro versos heptasílabos.
Deberán primar a orixinalidade, o enxeño e a crítica (mesmo o escarnio) no tratamento das temáticas social, política, cultural, deportiva... Os traballos deben entregarse nun sobre dirixido á asociación Pepe Barreiro, no que figurará como remitente un pseudónimo. Haberá premio ao retrouso, por 150 euros; tres premios de 100, 50 e 30 euros, e 17 premios de 10 euros cada un.
Carril bici e tren
Hai temas que son recorrentes ano tras ano, segundo explica Olga Díaz. Non faltan nunca os ferretes que aluden ao carril bici, ao esquecemento de Lugo en canto a infraestruturas ferroviarias, o estado das rúas ou o cuartel de San Fernando.
En canto á participación dos lucenses na tradición do Enterro da Sardiña, Olga Díaz é optimista, posto que cada ano aumentan o número de participantes e a cifra de socios do colectivo Pepe Barreiro. Aínda así, queda por resolver a brecha da idade: «Non logramos atraer aínda á xente máis nova, esta é unha sociedade de xente máis ben maior», apunta a presidenta. Pola contra, «conseguimos que a xente maior saia á rúa, a unhas horas e cunha climatoloxía nada propicias para iso, pero logramos que a xente se anime, e estamos encantados, ese é o noso motor, o que nos motiva á directiva», engade Olga Díaz.
Historia desta tradición
O Enterro da Sardiña leva organizándose na cidade desde principios dos anos oitenta, cando Pepe Barreiro creou toda esta posta en escena inspirándose en diferentes enterros de toda España, simulando unha procesión relixiosa, pero con outros personaxes, para poder botar man da sátira. Desde o ano 2000 é a Asociación Cultural Pepe Barreiro a que se encarga da organización. Outros lugares da provincia, como Vilalba, Monforte ou Viveiro, tamén contan coa celebración do Enterro da Sardiña.
Un concerto orixinal este domingo para quentar motores de cara ao Entroido
Domingo 8 • 19.30 horas • Círculo das Artes • Lugo • Entrada gratuíta ata completar o aforo •
A actividade da asociación Pepe Barreiro non se limita unicamente ao día do Enterro da Sardiña. Cada ano organizan actividades previas e paralelas, como charlas divulgativas, pero este ano decidiron apostar, como novidade, polo eido musical.
Por este motivo, este domingo terá lugar un orixinal concerto do Enterro da Sardiña, co suxerente título de «Mundos inversus». Actuarán o grupo lucense Ensemble Terra Nova e a agrupación ourensá Coro Kantantibus.
«Vai ser unha actividade moi interesante e sorprendente e, desde logo, diferente. Actuará un coro de Ourense, que é a provincia de máis tradición de Entroido, xunto a unha orquestra de Lugo», recorda Olga Díaz. A actividade está aberta a todo o mundo.