NO OUTEIRO | O |
14 ene 2005 . Actualizado a las 06:00 h.HAI DATOS que falan abondo. É tan doado de entender como dúas e dúas son catro. Se importamos máis que vendemos é coma se dixéramos que gastamos máis do que ganamos. Na información que ofrecía esta mesma edición lucense quedaba ben claro. Dolores Cela dábao no titular: «Las importaciones crecieron en Lugo un 50% y las exportaciones un 20,82%». Seguimos endebedándonos. Engadámoslle a iso a fortaleza do euro, xa que o BCE non quere subir os tipos de interese e o dólar, tratando de baixar o déficit, segue en mínimos, favorecendo a saída dos produtos USA. Claro que de subiren aquí os tipos atopariámonos con outro problema: que subirían as hipotecas; é dicir, outra volta máis no endebedamento. ¡Estamos pillados! Para cambialo habería que investir en investigación e desenvolvemento, favorecer a creación da industria e abrir mercados fóra. O obxectivo: exportar máis que importamos. Só así se crearía verdadeira riqueza acó. Créese solo industrial accesible, dótese de boas infraestruturas que favorezan a saída dos produtos manufacturados e bótese un sementeiro de verdadeiros empresarios que queiran arriscar aquí parte do seu capital.