Afirma que a súa elección polo presidente da Xunta colleuna por sorpresa e, como cidadá, aínda que non aconsella ao bipartito, aspira a actuacións máis rápidas
02 abr 2008 . Actualizado a las 02:00 h.O día despois da súa toma de posesión como presidenta do Consello Consultivo de Galicia, María Teresa Conde-Pumpido Tourón, pontevedresa, de 56 anos, ofrece unha receta de «consenso» e «diálogo» para impulsar la institución.
-¿Que novas funcións terá o Consello Consultivo?
-Eu dixen que non era o momento de reivindicar nada, senón de ser capaces de comprometernos. Conseguir un mellor traballo que dea lugar a ese crecemento, unha aspiración do Consello xa coñecida á que o propio presidente da Xunta se referiu. A lei, se se modifica, non vai ser de inmediato. Quédannos seis anos. -¿Deulle Touriño algunha orientación? -En absoluto. Foi unha cousa tan inesperada... Un ofrecemento xeneroso, sen ningún tipo de orientación ou cortapisa.
-¿Que prioridades se marca antes da reforma da lei?
-Esta presidencia está concebida como moi personalista. Non é a miña maneira de traballar. Penso que con consenso e diálogo se avanza moito.
-Algunhas leis teñen chegado ao Parlamento cunha redacción defectuosa, con topónimos incluso doutras comunidades autónomas...
-O que quereríamos é poder intervir nos proxectos de lei, esta é unha das aspiracións. O Consello Consultivo agora só asesora á Administración no que son normas de desenvolvemento regulamentario. Estamos en proxectos menos glamurosos, asesoramos a pequenos concellos, pero son traballos moi cercanos ao cidadán. Estamos en marzo e imos polos trescentos corenta e tantos expedientes.
-¿É unha das principais eivas actuais, a de non poder ditaminar proxectos de lei?
-Algúns consellos teñen esa facultade, outros non. Pero, polo que sei, o Parlamento ten magníficos letrados. O Constitucional recoñeceu que os consellos eran a peza lóxica e esencial nos autogobernos autonómicos.
- ¿Un Consello Consultivo con máis funcións podería ter entrado no da designación dos senadores autonómicos?
-Non creo. Entendo que é unha cuestión de funcionamento político, do propio Parlamento.
-¿O órgano consultivo informará só as leis especiais?
-É unha cuestión de oportunidade. No seu momento o presidente remitiu ao Consello Consultivo o proxecto de reforma do Estatuto de Autonomía, a nosa lei marco, e é moi significativo.
-Na última etapa de Fraga, a CIG levou o asunto dos cargos de libre designación, que a Administración quería facer fixos...
-Sei que houbo bastantes ditames con controversia e votos particulares, pero non o vivín, polo tanto, non coñezo os pormenores.
-O luns estaba o señor Albor, como ex presidente da Xunta, na súa toma de posesión...
-Acude aos plenos e pode aportar toda a visión que se ten como ex presidente, e incluso as dificultades de conectar intereses desde a presidencia.
-¿Non lle chama a atención que outros non solicitaran a entrada no Consello?
-Non, Fraga está no Senado... penso que prefiren outras experiencias. É humano.
-Vostede defende os consellos «proveitosos». ¿Como cidadán, daría algún ao bipartito?
-Non vou dar ningún consello. Eles son os que teñen que facer e saben que despois os vai xulgar a sociedade. Penso que estamos avanzando en moitas cousas. Aínda estamos empezando a segunda parte da lexislatura. Queda un ano e algo e, como cidadán, teño visto cambios. ¿Todos queremos máis? Nunca son todos os que queremos. Queremos avanzar máis a presa nos cambios.