«Custounos máis o título que o disco»

O cuarteto de arpistas Lulavai presenta mañá en Vigo o seu segundo traballo discográfico, Lémbrame un soño, no que manteñen o seu son característico, agora con máis composicións propias


Lorena Reinaldo (Ourense, 1978) destaca que o novo traballo de Lulavai, a formación de catro arpas e catro voces que integra xunto con Paula Oanes, Josefa Fernández e Elena Paz, é «máis persoal». Levan oito anos xuntas, tras coñecerse na orquestra Sondeseu e presentan mañá Lémbrame un soño.
 

-¿Que imos encontrar nel?
-O anterior levaba máis temas tradicionais, arranxados por nós e neste hai composicións propias, aínda que hai tamén un tema tradicional galego, unha nana vasca e unha pandeirada para darlle un toque distinto.
 

-¿Como xustifican esta nova proposta?
-Custounos máis o título que facer o disco. O título suxeríunolo un amigo portugués dunha canción do cantautor Fausto, porque di que a nosa música evócalle o mundo dos soños e porque a música das arpas coas voces lévate a unha atmosfera onírica.
 

-¿Por que agora?

-Pasaron bastante anos do anterior aínda que non quixeramos que pasasen tantos. Fomos nais as catro, e algunha repetindo, e compatibilizalo cos traballos non é doado. O grupo sempre seguiu tocando, pero tardamos un pouco máis do que nos gustaría en gravar o disco.

-É unha formación cando menos singular.
-A arpa non é o instrumento máis popular que nos rodea aínda que tivo tradición en Galicia ata a Idade Media, había arpas, e nas catedrais arpistas, pero deixou de ser un instrumento popular.
 

-¿Que tal é a receptividade do público?
-Non somos un grupo de masas, pero temos más xente en Portugal ca en Galicia. Neste caso ninguén é profeta na súa terra. En Portugal temos máis acollida e temos tocado moito. Penso que aprecian o que facemos. Aquí levamos un pouco de retraso nese aspecto. Igual a xente aquí está apostando por outros instrumentos, non sei cal é o motivo, pero a situación duns anos a esta parte é complicada para todos.
 

-¿Levan ben a loxística?
-Non é moi doado, pero xa temos transportado catro arpas e catro persoas nun só coche. Ocupan e pesan o seu, pero é o que ten escoller un instrumento destas características. 

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

«Custounos máis o título que o disco»