A microhistoria das Pontes, a tan só un clic

ANA F. CUBA AS PONTES / LA VOZ

FERROL

A actual avenida de Galicia das Pontes, no ano 1910
A actual avenida de Galicia das Pontes, no ano 1910

Xa se poden consultar parte dos máis de cinco mil documentos e fotografías dixitalizados e catalogados polo Museo Etnográfico Monte Caxado, na súa web

13 sep 2021 . Actualizado a las 05:00 h.

A mediados dos anos 80, José María López Ferro propuxo no claustro de profesores do colexio Monte Caxado das Pontes crear un museo etnográfico, e comezaron a recoller material. «Ao principio eran pezas, pero despois empezou a chegar algún documento [desde o século XVIII ata a actualidade], como escrituras de compravenda de propiedades, partixas, correspondencia persoal, libros, revistas, cómics, xornais, billetes, selos... e fómolos recollendo», repasa. Polo medio aparecían programas dos dous cines que había daquela, «o Hispania, o máis antigo, e o Alovi, que se conserva... entregábanos á saída da misa de doce para que a xente soubera cal era a carteleira desa tarde».

Tamén recibían «as vellas fotografías». «Nunca nos quedabamos cos orixinais, emprestábannolas, e ao principio, eu, cunha cámara e un obxectivo macro, facía foto da foto, ata que xa empecei a escanealas... E faciamos exposicións cada ano, ata 2014, nos corredores do colexio [...], e nos anos 2007 e 2009 sacamos catálogos fotográficos con algunhas delas», conta o artífice e director do Museo Etnográfico Monte Caxado (MEMC). E hai tres anos, cando crearon a Fundación MEMC, un dos obxectivos radicaba en dixitalizar este arquivo, toda a documentación doada polos veciños, «para expoñela ao público de xeito que puidese tela á man para a súa consulta con só un clic», a través dunha web.

Reverso dun programa de man do cine Alovi, que segue funcionando na vila
Reverso dun programa de man do cine Alovi, que segue funcionando na vila

Nestes tres anos conseguiuse, con apoio económico da Deputación da Coruña e do Concello, e co traballo das empresas locais Cultureume e Eumenet, que dixitalizaron e catalogaron a documentación recadada e crearon unha base de datos informatizada. O venres presentouse a páxina www.montecaxado.gal, onde xa se pode acceder a máis de 500 documentos, entre fotografías, audiovisuais e textos. O resto irase incorporando pouco a pouco, «nun proceso participativo, a través das redes sociais, para que a veciñanza identifique á xente das fotos», explica Xosé María López Fernández, de Cultureume.