«Ciudadanos trata ao PSOE coma unha pandemia, e equivócanse»

Cancela destaca a capacidade do Goberno de Sánchez de acordar con todas as forzas, excepto unha: Vox

Cancela é favorable a apostar polo diálogo en Cataluña.
Cancela é favorable a apostar polo diálogo en Cataluña.

santiago / la voz

Durante mais de ano e medio asumiu de forma provisoria o liderado do PSdeG logo da dimisión de Besteiro, que foi quen a recrutou para a primeira liña política. É Pilar Cancela (Stuttgart, Alemaña, 1967), cabeza de lista dos socialistas pola provincia da Coruña, que pensa que un dos inimigos do partido no 28A pode ser o exceso de confianza.

-Estará tranquila, nas enquisas xa gañaron.

-As enquisas nunca me dan moita tranquilidade, porque a porcentaxe de indecisos é moi alta, do 40%, e non hai que dar nada por feito. A mobilización ten que ser importante

-Teme ao exceso de confianza?

-E que temos que aprender dos erros, porque en Andalucía temos un laboratorio político fantástico no que participa a ultradereita e do que saen propostas de involución real para a sociedade.

-Vaia, tardou menos dun minuto en falar de Vox...

-Nin o mencionei, pero o certo é que Vox está aí marcando a axenda política do PP e Ciudadanos e temos que estar moi alerta.

-E que lle parece que propoñan un sistema semiprivado para manter as pensións?

-Non se agochan, queren rachar co sistema público de pensións que tanto custou crear. E a cuestión non é que Vox non se agoche, senón quen o acompaña nesa proposta, ou na rebaixa do salario mínimo, na regresión dos dereitos da muller ou na privatización dunha parte da sanidade.

-Van ao 28A co lema «Haz que pase», fai que pase o que?

-O lema refírese a que non involucionemos, a ver si somos capaces de afondar nunha folla de ruta progresista nos dereitos ou se temos que retroceder en cuestións como a violencia de xénero, a lei do aborto e outras cuestións que poñen á muller no punto de mira.

-Ata que punto o voto feminino vai ter incidencia nestas eleccións?

-Vai ser decisivo, o PSOE gañou sempre neste país cando houbo unha mobilización forte das mulleres. Poño por diante que non pretendo capitalizar o 8M, porque sería indecente facelo, pero o certo é que hai unha capacidade de reivindicación das mulleres que están dicindo que non están dispostas a que se lles toque nin un só dos dereitos e liberdades acadados durante tanto tempo.

-Lembra cal foi o seu primeiro acto de actuación política?

-Penso que foi nalgunha manifestación do ámbito laboral, e logo tiven a oportunidade de dedicarme como funcionaria ás relacións laborais. De nova era moi idealista e nos contactos que tiñamos coa patronal sempre me vían como moi roxa.

-A quen lle daría un ministerio no goberno do PSOE, a Pablo Iglesias ou Albert Rivera?

-Non se trata de repartir ministerios, iso de pedir Interior para depurar as cloacas do Estado ou outro para facer calquera outra cousa é moi frívolo, ao que aspiramos é a ter unha maioría suficiente para gobernar en solitario, con apoios preferentes na esquerda, pero con capacidade de acordar con todas as forzas políticas excepto unha.

-Entón vanlle poñer un cordón sanitario a Vox?

-Non me gusta a expresión. Ciudadanos emprégaa contra nós, trata ao PSOE coma unha pandemia e equivócanse. O PSOE é un partido constitucionalista e se vamos a producir unha pandemia que sexa de conquistas sociais. Equivócanse moito, porque ademais nos están deixando libre todo o centro político.

-Por que unha autoestrada se traspasa tan axiña ao País Vasco e aquí hai que agardar alomenos tres lexislaturas?

-Esa é unha pregunta trampa, pero ten unha explicación. As competencias que ten asumidas o País Vasco no seu Estatuto si que lle permite a xestión inmediata dunha autoestrada titularidade do Estado. Iso que non quita que recoñeza que hai unha débeda con Galicia, que é a AP-9, que por fin foi tomado en consideración o seu debate no Congreso e o noso prantexamento é responder a unha demanda unánime do pobo galego e sentarse a negociar ese traspaso na comisión mixta.

-Que Otegi diga que o PSOE vai por bo camiño logo de pactar, non é para tremer?

-Hai determinados persoeiros na política que non xeran simpatías, e si algo demostrou o Goberno de Pedro Sánchez nestes meses é que non chegou a ningunha conivencia nin pacto oculto co independentismo. Pero é importante que, aínda coa discrepancia política máis profunda, podamos ter sempre unha capacidade de interlocución e diálogo político. E logo chegarase a acordos ou non, pero establecer un hábito de diálogo non é malo, porque o contrario xa vimos en Cataluña a onde leva.

-Pero diálogo con que obxectivo?

-O obxectivo ten que ser sempre o ben común. Sei que soa a frase feita, pero a política é iso. Porque os que prantexan unha aplicación do 155 dura que queren? Intervir o Parlamento e o Goberno catalán, e que é o seguinte? Mire o que temos que facer é rebaixar a tensión e a crispación con este asunto.

«Si algo demostrou o Goberno é que non chegou a ningún pacto oculto co independentismo»

«Vox está marcando a axenda política do PP e de Ciudadanos e temos que estar moi alerta»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

«Ciudadanos trata ao PSOE coma unha pandemia, e equivócanse»