O escritor vigués Ramón Sandoval gaña o Avelina Valladares co poemario «Nas esquinas do frío»


a estrada / la voz

O escritor vigués Ramón Sandoval Pérez acaba de proclamarse gañador da vixésimo terceira edición do premio de poesía Avelina Valladares -convocado polo Concello da Estrada e a Asociaicón de Mulleres Avelina Valladares- co poemario titulado Nas esquinas do frío, presentado ao concurso baixo o lema Capricornio.

O xurado seleccionou a obra por unanimidade, destacando que se trata dun poemario «no que o autor aborda conceptos sociais de contemporaneidade desde unha cualitativa profundidade acompañada de frescura e baseamento poético». «O ton dos poemas vai polo pesimismo xerado na experiencia vital, onde se salienta a esperanza de non nos dar por vencidos», recolle a acta do xurado. «A frescura dos versos sen perderen a fondura do seu contido, rexistrado no literario e poético, fai deste poemario a merecencia do premio Avelina Valladares», conclúen.

A obra foi elixida entre vinte poemarios inéditos xa que, aínda que ao concurso se presentaron un total de 23, tres deles foron publicados ou premiados antes do fallo e polo tanto quedaron excluídos da convocatoria.

O xurado estivo integrado por Ana Cabaleiro López, Esteban Folgar Brea, Rosalía Morlán Vieites, David Otero Fernández e Noni Araújo Arias, actuando como secretaria.

Entrega na Festa da Poesía

O premio está dotado con 2.000 euros e mais a publicación do poemario. Será entregado o día 29 de novembro no transcurso da Festa da Poesía.

O autor gañador é natural de Vigo. Gañou no ano 2013 o premio Victoriano Taibo na súa sexta edición coa obra Territorios Estraños. Ten publicada esta obra polo Instituto de Estudos Miñoranos e Como una lluvia, no selo El Paisaje Editorial.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O escritor vigués Ramón Sandoval gaña o Avelina Valladares co poemario «Nas esquinas do frío»