Samuel Diz rende tributo, coa guitarra de Lorca, á escritora da xeración do 27 María Teresa León
CULTURA
Gravado na Huerta de San Vicente, en Granada, na casa museo do universal poeta, o disco preséntase en Galicia con concertos en Santiago e A Coruña
16 sep 2020 . Actualizado a las 05:00 h.O guitarrista e investigador Samuel Diz (Tui, 1986) réndelle tributo á escritora da xeración do 27 María Teresa León, unha homenaxe para a que gravou un feixe de composicións musicais daquel grupo poético e tamén do exilio republicano español, na súa maioría inéditas. E, sobre todo, fíxoo tocando a guitarra de Federico García Lorca e elixiu un escenario especialísimo en Granada, a Huerta de San Vicente, finca de veraneo familiar do autor de Yerma e que agora acolle a casa museo.
O froito dese rexistro é o álbum Memoria de la melancolía, que retoma a autobiografía de María Teresa León -en outono cumpriranse os 50 anos da publicación de Memoria de la melancolía (Losada, 1970) en Buenos Aires- como folla de ruta polas cidades que ela habitou, explica o propio artista, que visitou diferentes arquivos e escenarios coma Madrid, Roma, Ciudad de México, París e La Habana, último destino deste percorrido e onde, lembra, coñeceu a Aitana Alberti León. Os pormenores deste traballo, da pesquisa, están recollidos nun amplo libreto que acompaña o disco, publicado por Poliédrica e que culmina a liña de investigación lorquiana que comezou con Impresiones y paisajes, como el primer libro de Lorca, editado no 2015 polo mesmo selo.
Memoria de la melancolía é o primeiro álbum gravado coa guitarra orixinal de Lorca, construída por José Ortega en Granada arredor de 1906 e restaurada en 1996 por Francisco Manuel Díaz por iniciativa da sobriña do escritor Laura García-Lorca. A guitarra é xa toda unha icona do século XX; de feito, dende a súa restauración, non son poucos os creadores de talla internacional que buscaron a súa maxia: Vicente Amigo, Tomatito, Bob Dylan, Patti Smith e Lou Reed, entre eles.
Despois da estrea do proxecto o pasado xoves 10 de setembro en Granada con este instrumento histórico, Diz ofrece en Galicia -onde tocará cunha copia facsímile da guitarra de Lorca, construída expresamente para o músico galego polo mestre Francisco Manuel Díaz- os dous seguintes concertos da xira de presentación, co apoio do fondo cultural do Xacobeo 2021.
Dúas actuacións
A primeira cita é este mércores en Santiago, na Fundación Eugenio Granell, onde Diz ofrece cinco micro-concertos (ás 12, 13, 17, 18 e 19 horas) acompañado polo músico lalinense Benxamín Otero. Estas interpretacións, sinala o artista, dialogarán co contido da exposición Maruxa Seoane: achegamento a María Elvira Fernández López, creando un espello entre as figuras de María Teresa León e Maruxa Seoane e lembrando os seus anos de exilio na Arxentina.
Xa o domingo 20 de setembro a cita será no Museo de Belas Artes da Coruña, onde o guitarrista e o oboísta Benxamín Otero contarán coa participación da poeta Yolanda Castaño, quen porá viva voz a fragmentos das memorias de León nunha tradución ao galego. Será ás 12.30 horas, como parte dos actos de clausura da mostra O legado de Maruxa Seoane, que completa (e se completa) o retrato da Fundación Granell.