Será este vindeiro sábado 25 de outubro, con pregón, música e degustación «a fartar»
18 oct 2025 . Actualizado a las 21:57 h.Sábado 25 de outubro • Na Costa da Morte non faltan festas gastronómicas nin de verán nin de inverno. Menos aínda en outono, con tanto froito que celebrar, e para mostra a Feira das Fabas de Ponteceso, que o Concello celebrará este vindeiro sábado 25 de outubro, acadando a súa 33.ª edición. «Un programa repleto de música, gastronomía e homenaxes», avanzan dende a organización.
Botarán a andar as actividades ao fío do mediodía, cos pasarrúas de Os Picurruchos, e chegará ás 14.00 un dos momentos centrais, o do pregón. Correrá a cargo de Gil da Campara, e as súas serán palabras de recoñecemento a gandeiros, polo seu labor esencial para o sector e a tradición local. Tamén para a veciñanza, véxase o seu papel nos incendios que afectaron a este municipio en agosto. Logo do discurso virá o máis agardado, a degustación de «fabas a fartar», «símbolo da gastronomía pontecesá»: as entradas poden adquirirse durante a semana na Tesourería do Concello e o propio día no Campo da Feira. Judith Cundíns será a encargada de amenizar a tarde, sumando a música ao sabor do prato.