«O comercio ten que ir cos tempos»

«Hoxe, unha tenda que non ten escaparate en Internet ou nas redes perde oportunidades», conta a directora xeral


Carballo / La Voz

A directora xeral de Comercio, Sol Vázquez Abeal, achegouse onte ata a sede da Fundación Eduardo Pondal, no Couto (Ponteceso), para falar do comercio intelixente: do que é e das vantaxes que supón, da necesaria adaptación.

-¿Que é iso que contan de que queren revolucionar o comercio?

-O que buscamos é este novo comercio que chamamos intelixente, o smart commerce. O comercio galego ten que ir cos tempos, cos actuais, e ten que prepararse, sobre todo agora que se detecta unha alza da confianza do consumidor e das vendas. Tenlle que dar respostas aos clientes, adaptarse a el, e o cliente é cada vez máis dixital: manexa o móbil, consulta Internet e as redes antes de mercar... Xa non é só imaxe, bolsas ou escaparates, que tamén, senón que este novo comercio, o comercio do século XXI; ha de chegar ao cliente por todos, todos os medios posibles.

-¿E que ofrecen entón para que esa adaptación sexa posible?

-Temos aberta unha liña de axudas para chegar a ese smart commerce, por un total de 3,1 millóns de euros. O prazo para solicitalas acaba ao 18 de febreiro, de aí tamén estas charlas. Subvenciónanse varios aspectos. En primeiro lugar, cambios na imaxe [axudas ata o 40 %]: o comercio do século XXI ten que entrar polos ollos e isto permite renovar o exterior ou equipamento. En segundo lugar, ferramentas de xestión [axudas ata o 50 % do custe]: á parte das terminais de punto de venda (TPV), hoxe hai de todo, ata perchas intelixentes que che din o stock que queda en almacén. Niso inclúese tamén a mellora do produto final: por exemplo, unha máquina que nunha mercería escanee un nome e permita incorporalo nun babeiro. A terceira rama desta liña de subvencións [asemade ata o 50 %] sería a referente ao packaging: unha bolsa bonita, unha caixa, papel cebola para envolver... todo iso mellora a percepción do teu comercio.

-Certo: hai exemplos de tendas que destacan entre o seu público polo ben que envolven os regalos.

-Iso mesmo. Logo aínda quedaría a cuarto apartado ao que axuda esta liña: a comunicación cos clientes. Hoxe, o comercio que non ten un escaparate en Internet, perde oportunidades. Incluímos axudas pensadas tanto para webs con comercio online como para aquelas que só son unha presentación de imaxe e filosofía. Ofrecemos ademais a posibilidade de que teñan un community manager que lle leve as redes sociais. Na actualidade, a maioría das tendas están en Facebook e Instagram. Twitter xa algo menos, pero hai quen non sabe empregar a linguaxe das redes e por iso nós habilitamos o servizo. Animámolos a estar presentes, porque inflúe: lembro unha mercería en Tui que vende moito a Valencia.

-¿Todo isto é posible aínda non sendo cidade, aquí na Costa da Morte?

-Si, porque para estar na rede dá igual o sitio físico, e chegas a todo o mundo. O teu mercado xa non sería só Ponteceso, ou os teus veciños, senón o mundo enteiro. O importante, e niso é no que incidimos, é como te presentes a eles.

«A nivel europeo, está habendo unha tendencia da xente de volta ao propio, ao local»

A maiores deses catro puntos subvencionables que habilita a liña de smart commerce (imaxe, ferramentas de xestión e mellora do produto local, packaging e comunicación cos clientes a través de web e redes), tamén se inclúe un apartado para asociacións ou federacións de comerciantes que pensen nalgún sistema de fidelización cos compradores, segundo conta Vázquez Abeal. Ela quere lanzar unha mensaxe de ánimo.

-Non queda outra que adaptarse aos tempos, polo que parece.

-Queremos que a idea vaia por aí. Sabemos que parece complicado, porque as cousas mudaron, pero se non se está preparado é aínda máis difícil. Hai catro anos ninguén diría que Facebook, por poñer un exemplo, tería tanta importancia para o comercio: case ningunha tenda estaba aí. Pero hoxe é necesario. Non obstante, tamén insistimos noutra cousa importante: para vender a través de Internet é preciso ter tenda fixa.

-Hai comercios locais, pese a iso, que ven a venda por Internet como prexudicial para eles.

-Lembro agora unha librería que distribúe libros moi específicos en galego. Xente que está en Cataluña, por exemplo, só ten esta vía. Non ten por que ser unha competencia: o que temos que buscar é onde está o nicho de mercado en Internet e aproveitalo. Hoxe en día, se poñemos o nome do que queremos en Google, saen moitas opcións, e o comercio en cuestión ten que estar aí.

-¿E con respecto ao outro grande «monstro», a grande superficie?

-Hai unha tendencia da xente, a nivel europeo, e non só en Galicia, a volver ao propio, ao local, ao pequeno comercio. Ikea mesmo pon tendas de demostración no centro precisamente por iso. O que queremos é lanzar unha mensaxe de ánimo ao comercio galego, porque todo son modas, e agora volve a moda do local, polo que hai que estar preparados.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«O comercio ten que ir cos tempos»